Kurti për ndalimin e Agushollit: Provë që Serbia s’do marrëdhënie normale

Kryeministri në detyrë, Albin Kurti, ka deklaruar se shteti serb nuk lëshon rast për të dëshmuar se nuk synon marrëdhënie normale e fqinjësore me Kosovën, teksa foli për rastin e ndalimit të ish-deputetit Gramos Agusholli, në pikën kufitare të Merdarit.

Kurti ka shkruar në Facebook se praktika të tilla që përdoren nga Serbia “me qëllim keqtrajtimi e frikësimi të qytetarëve duhet të dënohen zëshëm dhe njëzëri edhe nga komuniteti ndërkombëtar”.

Ai është shprehur se ndalimi i Agushollit është një prej provave që Serbia nuk dëshiron raporte normale.

“Serbia nuk lëshon rast për ta dëshmuar se nuk do e as synon marrëdhënie normale e fqinjësore. Ndalimi i ish-deputetit të Kuvendit të Kosovës, Gramos Agushollit nga autoritetet e shtetit serb në pikën kufitare në Merdarë për orë të tëra është prova e radhës. Praktika të tilla që përdoren në vazhdimësi me qëllim keqtrajtimin dhe frikësimin e qytetarëve tanë duhet të dënohen zëshëm dhe njëzëri edhe nga komuniteti ndërkombëtar. Përgëzoj institucionet tona dhe shtetet partnere për reagimin e shpejtë dhe të suksesshëm. Gramosit i dëshiroj qëndrim të mbarë në Lubjanë”, ka shkruar Kurti.