Anushiq: Jashtëzakonisht e rëndësishme prania e trupave amerikane në KFOR

Në ditën e dytë të konferencës së sigurisë në Munih, kryeministri Albin Kurti, ka diskutuar mbi çështjen e mbrojtjes dhe të sigurisë me ministrin kroat të Mbrojtjes, Ivan Anushiq, dhe me atë të Punëve të Jashtme të Turqisë, Hakan Fidan. Kosova u bë temë diskutimi edhe në takimin që ministri kroat Anushiq e pati me zëvendësndihmëssekretarin amerikan për Mbrojtje, Politika Evropiane dhe NATO-n, David Baker. Me këtë rast, Anushiqi e ka vlerësuar me rëndësi të jashtëzakonshme praninë e trupave amerikane në Kosovë

Edhe përfaqësues të shteteve të rajonit kanë shtruar nevojën që Shtetet e Bashkuara t’i mbajnë trupat ushtarake në Evropë, e veçmas në Kosovë, pas paralajmërimit të presidentit Donald Trump për mundësinë e tërheqjes së tyre.

Ministri i Mbrojtjes së Kroacisë, Ivan, Anushiq, e ka theksuar këtë në takimin që e ka realizuar të shtunën me zëvendësndihmëssekretarin amerikan për Mbrojtje, Politika Evropiane dhe NATO-n, David Baker.

“Në mënyrë të veçantë theksova se çelësi i sigurisë në Evropën juglindore është Kosova dhe se prania amerikane në KFOR është jashtëzakonisht e rëndësishme”, ka thënë Anushiq, në takimin që është mbajtur në margjinat e Konferencës së Sigurisë në Munih.

Anushiq gjatë së shtunës është takuar edhe me kryeministrin Albin Kurti.

Bashkëpunimi ndërshtetëror në fushën e industrisë së mbrojtjes, sipas njoftimit të Zyrës së Kryeministrit, ka qenë temë qendrore e diskutimit në këtë takim.

Edhe Arbëri 15 shk 2025 Ministri kroat: Prania e trupave amerikane në Kosovë, jashtëzakonisht e rëndësishme

“Krahas marrëdhënieve bilaterale, bashkërendimit të vazhdueshëm dhe bashkëpunimit të deritanishëm në fushën e mbrojtjes, diskutuan rreth mundësive të reja për bashkëpunim në fushën e industrisë së mbrojtjes”, thuhet në njoftim.

Në margjina të Konferencës së Sigurisë, Kurti e ka trajtuar edhe zhvillimin e industrisë shtetërore të mbrojtjes.

Ai e ka takuar edhe ministrin e punëve të Jashtme i Turqisë, Hakan Fidan, për mbështetjen në zhvillimin e industrisë vendore të mbrojtjes, duke iu referuar nënshkrimit të marrëveshjes me kompaninë turke “MKE” për funksionalizimin e fabrikës së municioneve.

Kryeministri në detyrë ka shprehur mirënjohjen edhe për mbështetjen që Turqia ia jep Kosovës në arenën ndërkombëtare.

“Kryeministri tha se Turqia është partner dhe aleat i Kosovës me të cilin kemi marrëdhënie bilaterale të forta dhe bashkëpunim të afërt në shumë fusha, përfshirë ekonomi dhe mbrojtje. Ai e falënderoi ministrin Fidan për mbështetjen e Turqisë për Kosovë në rrafshin ndërkombëtar, kontributin në sigurinë e Kosovës përmes KFOR-it dhe partneritetin në zhvillimin e industrinë vendore të mbrojtjes me marrëveshjen e nënshkruar me kompaninë turke MKE për funksionalizimin e fabrikës së municionit”, thuhet në njoftimin e Zyrës së Kryeministrit.

Çështja e mbrojtjes dhe sigurisë është trajtuar edhe në takimin që presidentja Vjosa Osmani ka realizuar në Munih me komandantin suprem të Forcave Aleate për Evropë në NATO, gjeneralin Christopher Cavoli.

Ajo e ka vlerësuar të pazëvendësueshëm rolin e NATO-s në Kosovë.

“Diskutuam mbi rolin e pazëvendësueshëm të NATO-s në Kosovë gjatë 23 vjetëve të fundit në mbrojtje të sigurisë dhe stabilitetit. Në këtë kohë përcaktuese për kontinentin evropian, riafirmova përkushtimin e institucioneve të Republikës së Kosovës për një bashkëpunim të ngushtë me aleancën, duke kontribuar aktivisht në sigurinë e rajonit dhe më gjerë”, është cituar Osmani, në njoftimin që Presidenca e ka lëshuar për këtë takim.

Edhe Arbëri 15 shk 2025 Kurti falënderon Turqinë për mbështetjen në zhvillimin e industrisë së mbrojtjes

Osmani gjatë ditës ka takuar edhe presidentin e Letonisë, Edgars Rinkevics, e gjatë të cilit temë qendrore ka qenë siguria.

“ Si dy shtete në frontin e parë të ruajtjes së demokracisë, Kosova dhe Letonia janë të paluhatura në angazhimin për siguri, paqe dhe vlerat që na bashkojnë”, është cituar Osmani në njoftimin e Presidencës. “Mirënjohëse për mbështetjen e palëkundur të Letonisë në rrugëtimin tonë euroatlantik”.

Osmani është takuar edhe me delegacionin e kongresistëve amerikanë në Konferencën e Sigurisë në Munih.

“Mbështetja e Kongresit Amerikan ka luajtur një rol kyç në shkrimin e historisë së Kosovës së lirë, të pavarur dhe sovrane. Kjo mbështetje vazhdon edhe sot, ndërsa punojmë së bashku për të adresuar sfidat e përbashkëta dhe për të hapur kapituj të rinj bashkëpunimi që thellojnë dhe fuqizojnë më tej aleancën tonë historike”, ka thënë ajo.

Çështjet e sigurisë përbëjnë brengë për Evropën, prejse Donald Trump është konfirmuar president i SHBA-së.

Zëvendëspresidenti amerikan, JD Vance, mund të lajmërojë tërheqjen e “një pjese të madhe” të ushtarëve të stacionuar në Evropë, ka thënë një ditë më parë diplomati Christoph Heusgen, i cili është kryesues i Konferencës së Sigurisë në Munih.

“Supozoj se zëvendëspresidenti amerikan do të njoftojë tërheqjen e një pjesë të madhe të trupave amerikane nga Evropa, dhe se Evropa duhet ta marrë përsipër detyrën (për ta mbrojtur veten)”, ka thënë ai.

Edhe Arbëri 8 kor 2026 Kurti e komandanti i KFOR-it shqyrtojnë mundësitë për zgjerimin e bashkëpunimit

Janë rreth 100 mijë trupa amerikane të vendosura në kontinentin e Evropës, pjesa më e madhe e të cilëve si të përhershëm.

Në Kosovë, në kuadër të KFOR-it janë mbi 600. E, baza më e madhe amerikane është Bondsteel, që ndodhet në Ferizaj.