11-vjeçarja shqiptare që synon majën e baletit botëror

Në mesin e mijëra fëmijëve që ëndërrojnë të ngjiten në skenat më të mëdha të baletit, një emër shqiptar po tërheq gjithnjë e më shumë vëmendje.

Është vetëm 11 vjeçe por lëvizjet e saj janë mahnitëse.

Leandra Agushi, e lindur në Zvicër dhe me prejardhje nga fshati Smirë i Vitisë, po ndërton rrugëtimin e saj si balerinë me hapa të sigurt.

Për të, baleti është pjesë e përditshmërisë së saj.

Orë të gjata stërvitjesh dhe shumë sakrifica e kanë sjellë deri në arenën më të madhe ndërkombëtare të vallëzimit.

“Unë e kam emrin Leandra Agushi, unë i kam 11 vjet. Unë jam nga Smira e Vitisë dhe në Zvicër në Aura”, thekson ajo.

Edhe SOT 7 gus 2026 Dy volejbollistet shqiptare që po korrin suksese në Zvicër

Pas një paraqitjeje të suksesshme në garën prestigjioze Dance World Cup, e zhvilluar në Dublin të Irlandës, Leandra arriti të sigurojë kualifikimin në World Finals 2027, finalen e madhe që do të mbahet nga 29 qershori deri më 9 korrik në Lisbonë të Portugalisë.

Në këtë ngjarje marrin pjesë mijëra valltarë nga dhjetëra shtete të botës.

Në skenë, Leandra përfaqëson Zvicrën, por me krenari mban gjallë edhe prejardhjen e saj shqiptare.

Ajo është vajza e Leotrim Agushit dhe mbesa e rekordmenit të njohur botëror Agim Agushi.

Lidhjen me Kosovën nuk e ka humbur asnjëherë. Çdo verë kthehet në Smirë të Vitisë, vendlindjen e babait, ku kalon pushimet pranë familjarëve dhe ruan lidhjen me rrënjët e saj.

Edhe Luftarake 2 jan 2026 “Për ty babë” - rrëfimi i Berishajt, sportistja më e mirë në Malin e Zi

Pas çdo medaljeje dhe duartrokitjeje qëndron edhe mbështetja e familjes. Babai i saj, Leotrim Agushi, ka qenë pranë saj në çdo provë, në çdo garë dhe në çdo sfidë. Ai tregon se pasioni i Leandrës për baletin u shfaq që në moshë shumë të vogël dhe se talenti i saj është zhvilluar falë punës së palodhur dhe përkrahjes së vazhdueshme.

Megjithëse është ende fëmijë, Leandra tashmë ka nisur përgatitjet intensive për finalen në Lisbonë. Synimi i saj është të konkurrojë denjësisht mes balerinëve më të mirë të botës dhe të vazhdojë të ngjitet edhe më lart në karrierën artistike.