Gatimi, hap i madh për Demi Lovaton drejt rikuperimit nga bulimia

Këngëtarja Demi Lovato ka treguar se të mësuarit për të gatuar ka qenë një hap shumë i madh në rrugën e saj të rikuperimit nga bulimia, ka shkruar Daily Mail.

Teksa po përgatitet të publikojë librin e saj të parë me receta, ajo ka folur në një ngjarje në “92nd Street Y” në New York, ku prezantoi librin “One Plate at a Time: Recipes for Finding Freedom with Food”, që pritet të dalë më 31 mars.

Libri përmban mbi 80 receta, si “Spag Bol”, pule “Milanese” me sallatë rukola dhe “Pulled Pork”, dhe është ndërtuar rreth marrëdhënies së saj me ushqimin, pas viteve të vështira me çrregullime të të ngrënit.

Demi ka treguar se ndryshimi në qasjen e saj ndaj gatimit nisi rreth pesë vjet pas fillimit të rikuperimit, kur ishte 30 vjeçe. Ajo ka kujtuar se një moment i thjeshtë, gatimi me miq, ishte pikë kthese për të.

“Ishte festive dhe argëtuese. Mendoj se ky libër është një festë, sepse tregon sa larg kam arritur. Dikur hyja në supermarket dhe shpërtheja në lot, sepse ndihesha e mbingarkuar nga ushqimi. Tani jo vetëm që shkoj vetë për të bërë blerjet, por edhe gatuaj ushqimet që përgatis, dhe kjo është një fitore shumë e madhe për mua”, ka thënë ajo.

Një nga momentet që i ndryshoi perspektivën ishte përgatitja e një recete të thjeshtë me miqtë.

“E kthyem në një sallatë me kungull spaghetti. Ishte receta e parë që gatova me miqtë dhe mendova: ‘Uau, kjo është vërtet kënaqësi’”, ka thënë ajo.

Demi ka theksuar se gatimi e ndihmoi të krijojë një lidhje më pozitive me ushqimin dhe me veten.

“Kur hyra në kuzhinë dhe ndjeva gëzim, u ndjeva edhe krenare për atë që bëra. Doja të krijoja një libër për njerëzit që kanë pasur probleme me ushqimin ose që ndihen të pasigurt në kuzhinë”, ka thënë aktorja.

Ajo ka shtuar se libri synon t’i ndihmojë njerëzit të ndihen më rehat me gatimin.

“Gjithçka nis duke hyrë në kuzhinë dhe duke u mësuar me gatimin. Kjo të përgatit për sukses më vonë, me receta më të avancuara”, ka thënë ylli.

Në një postim të mëhershëm për librin, Lovato ka thënë se ky libër është plot me receta të thjeshta dhe të ngrohta që e kanë ndihmuar të rilidhet me veten dhe të gjejë liri dhe gëzim në kuzhinë.

“Ndjenja që nuk mendoja se do t’i përjetoja ndonjëherë”, pati shkruar ajo.

Në fund, ajo e përshkroi gatimin si akt kujdesi ndaj vetes dhe të tjerëve.

“Më ka ndihmuar ta shoh gatimin si akt dashurie dhe mirësie ndaj vetes dhe njerëzve të jetës sime. Shpresoj që ky libër ta sjellë të njëjtën ndjenjë edhe në shtëpitë tuaja”, ka thënë Lovato.