Të akuzuarit për krime lufte, Çasllav Joliq, i ulet dënimi në rigjykim

Me 5 vjet e 6 muaj është dënuar për krime lufte, Çasllav Joliq. Shkalla e dënimit është më e ulët për 2 vjet e gjysmë se sa në aktgjykimin e vitit të shkuar, pasi që në rigjykim Joliqi është liruar nga dy pika të aktakuzës të cilat lidhen me krimet e kryera në komunën e Istogut

Gjykata Themelore në Prishtinë e ka dënuar në rigjykim Çasllav Joliqin me 5 vjet e 6 muaj burgim për krime lufte të kryera gjatë periudhës së viteve 1998-1999 në Komunën e Istogut.

Krahasuar me aktgjykimin e parë, shkalla e dënimit është për dy vjet e gjysmë burgim më pak.

“Kjo gjykatë e gjen fajtor për pikën A, të përshkrimit faktik të aktakuzës, respektivisht për veprën penale ‘Krime lufte kundër popullsisë civile’, nga neni 142, lidhur me nenin 22, sipas ligjit. Të njëjtin e gjykon për veprën penale ‘Krime lufte kundër popullsisë civile’, të njëjtin e gjykon me dënim me kohëzgjatje prej 5 vite e 6 muaj burgim, ku koha e kaluar në masën e paraburgimit, i llogaritet në dënimin e shqiptuar”, ka thënë Ngadhnjim Arrni, kryetar i trupit gjykues.

Gjatë shpalljes së vendimit, në sallën e gjykimit nuk ka qenë i pranishëm i akuzuari Joliq, as avokati i tij, por as prokurori special, Ilir Morina.

Në procesin e ri gjyqësor, Joliqi është liruar nga dy pika të aktakuzës të cilat ndërlidhen me krime lufte.

“Lidhur me pikat B dhe C të përshkrimit faktik, kjo gjykatë ka gjetur se nuk është vërtetuar se i akuzuari Çasllav Joliq ka kryer këto veprime. Gjykata me aktvendim të posaçëm të akuzuarit Çasllav Joliq, i vazhdon masën e paraburgimit derisa aktgjykimi të marrë formën e prerë”, ka bërë të ditur Arrni.

Edhe Arbëri 23 maj 2025 Themelorja në rigjykim ia ul dënimin të akuzuarit për krime lufte në Istog, Çasllav Joliq

Joliqi është dënuar me tetë vjet burgim, nëpërmjet aktgjykimit të shpallur më 10 qershor të vitit 2024, por Apeli e ka kthyer rastin në rigjykim.

Sipas aktakuzës, gjatë periudhës kohore prej janarit të 1998-s e deri më 21 qershor të 1999-tës, në territorin e Komunës së Istogut, në bashkëkryerje me persona të tjerë, Joliqi ka aplikuar masat e torturimit dhe shkaktimit të vuajtjeve të mëdha kundër popullatës civile.