Rahoveci e ka mbrojtur titullin në elitën e hendbollit kosovar.
“Vreshtarët” të enjten mbrëma e fituan edhe ndeshjen e dytë të serisë finale të plejofit ndaj Kastriotit.
Pas fitores në shtëpi në ndeshjen e parë, Rahoveci në palestrën “Bill Clinton” në Ferizaj, fitoi me rezultatin 34:32.
Ndeshja ishte dramatike dhe e luftuar deri në fund.
Titulli u sigurua pas dy vazhdimeve nga pesë minuta.
Edhe
Hendboll, Kastrioti një fitore larg titullit
Pjesën e parë, Rahoveci e fitoi me rezultatin 14:13.
Kastrioti ishte duke fituar dy minuta para fundit me një gol dallim dhe ishte fare pranë që ta dërgojë serinë finale në ndeshjen e tretë.
Por, Egzon Gjuka realizoi për 25:25.
Deniz Terziqi në minutën e fundit të ndeshjes realizoi për Kastriotin për 26:25, por goli i tij u vlerësua i parregullt për gjyqtarët fillimisht. Pas rishikimit të situatës, gjyqtarët vendosën që ta pranojnë golin e realizuar.
Kështu, Kastrioti krijoi sërish epërsi prej një goli, 26:25.
Gjuka shënoi edhe një herë për Rahovecin katër sekonda para fundit për 26:26 dhe ndeshja shkoi në vazhdime dy herë nga pesë minuta.
Në vazhdime, Rahoveci ishte më i mirë në mbrojtje e më efikas në sulm për fitore dhe për titullin e dytë rresht.
Edhe
Kastrioti fiton ndeshjen dramatike me Rahovecin, kualifikohet në finale
Gjuka dhe Alban Hazir ishin më të mirët në këtë triumf të Rahovecit. Ata ndeshjen e mbyllën me nga shtatë gola të shënuar. Victor Alonso Garcia i realizoi gjashtë gola, ndërsa me nga pesë gola ndeshjen e mbyllën Arbios Mushkolaj dhe Mali Luzha.
Te Kastrioti, Terziqi kontribuoi me nëntë gola, kurse paraqitje të mirë patën edhe Yassine Henahen dhe Lulzim Shabani. Henahen i shënoi gjashtë gola, teksa Shabani i pati pesë në total, por të pamjaftueshme për ta shmangur disfatën.
Rahoveci e mbylli stinorin e rregullt pa humbje të pësuar, me vetëm një barazim, atë ndaj Kastriotit. Ndeshjet tjera i fitoi.
Në gjysmëfinale të plejofit e eliminoi pa vështirësi Prishtinën.
Ndërkohë, Kastrioti mbetet fitues i Kupës së Kosovës në edicionet e fundit.
Në gjysmëfinale kishte fituar ndaj Rahovecit, ndërsa Besa Famgasin e kishte mposhtur në finalen e zhvilluar në palestrën “Bill Clinton”, para 3 mijë shikuesve.
Palestra ishte e mbushur me shikues edhe të enjten mbrëma.
Edhe
Rahoveci e fiton finalen e parë, i afrohet titullit
Kastrioti në pjesën e rregullt të kampionatit përfundoi në vendin e dytë. Në gjysmëfinale e eliminoi Besa Famgasin pas tri ndeshjeve.
Por, mbetet pa titull të kampionit që prej vitit 2011.
