Fituesja e “Copa Libertadores 2022”, Flamengo, është bërë skuadra e parë që e ka siguruar fazën nokaut të Kupës së Botës për Klube që po mbahet në Shtetet e Bashkuara të Amerikës.
Skuadra braziliane të premten mbrëma në Philadelphia e mposhti Chelsean e Premier Leagues angleze, 3:1.
Të dyja skuadrat i fituan ndeshjet hapëse të Grupit D me rezultatin 2:0, por Flamengo ka avancuar tutje nga ky grup me gjashtë pikë në dy ndeshje.
Chelsea ka tri pikë në vendin e dytë.
Pedro Neto shënoi për “blutë” e Londrës në minutën e 13-të.
Në pjesën e dytë, brazilianët realizuan dy gola për tre minuta për 2:1.
Fillimisht, Bruno Henrique në minutën e 62-të i barazoi shifrat në 1:1, kurse Danilo e kaloi në epërsi Flamengon me golin e minutës së 65-të.
Për ndërhyrje të ashpër me të kuq u përjashtua Nicolas Jackson i Chelseat, në minutën e 68-të. Ai në lojë kishte hyrë vetëm katër minuta më herët.
Flamengo e shfrytëzoi epërsinë numerike të lojtarëve në fushë dhe realizoi për 3:1 në minutën e 83-të.
Shënues ishte Wallace Yan.
