Kampioni i Italisë, Napoli, është ndalur në fazën e ligës në Champions.
Të mërkurën në “Diego Maradona”, Napoli pësoi 3:2 nga Chelsa në kuadër të xhiros së fundit të Ligës së Kampionëve. Dhe kjo humbje bëri që Napoli të mos avancojë në fazën nokaut.
Napoli, që po përballej me mungesa të shumta, kishte epërsi 2:1 në pjesën e parë. Por Joao Pedro shënoi në minutën e 61-të dhe të 82-të për fitoren 3:2 të Chelseat.
Skuadra londineze kaloi në avantazh 1:0 në minutën e 19-të. Nga pika e bardhë shënoi Enzo Fernandez.
Antonio Vergara në minutën e 33-të dhe Rasmus Hojlund në minutën e 43-të shënuan golat për Napolin.
Napoli në tetë ndeshje mblodhi vetëm tetë pikë, që ishin të pamjaftueshme për kalim në plejofin e fazës nokaut.
Chelsea e përfundon fazën e ligës me 16 pikë dhe kualifikohet direkt në një të tetën e finales.
