-
Përktheu:
Flutura Gashi-Mehmeti
- 23 dhjetor 2025 21:23
- Shpërndaje në:
Asambleja Kombëtare e Venezuelës, e kontrolluar nga partia në pushtet, ka miratuar unanimisht të martën një ligj që lejon dënime me burgim deri në 20 vjet për këdo që promovon ose financon atë që e përshkruan si pirateri ose bllokada.
Ligji, i cili përfshin "krime të tjera ndërkombëtare", vjen pas veprimeve të fundit të SHBA-së kundër dërgesave të naftës venezueliane, raporton Reuters.
Roja Bregdetare e SHBA-së ka sekuestruar një supertanker të sanksionuar që transportonte naftë bruto venezueliane në fillim të këtij muaji dhe është përpjekur të kapte dy anije të tjera të lidhura me Venezuelën gjatë fundjavës, kanë thënë zyrtarët amerikanë.
Këto kapje shënojnë goditjen më të fortë të Uashingtonit ndaj kompanisë shtetërore të naftës PDVSA që kur Departamenti i Thesarit vendosi sanksione ndaj ish-partnerëve tregtarë të kompanisë së naftës, dy degë të Rosneft të Rusisë, në vitin 2020, duke e detyruar atë të ulë prodhimin dhe eksportet. PDVSA ishte tashmë nën sanksione që nga viti 2019.
Projektligji "Ligji për të Garantuar Lirinë e Lundrimit dhe Tregtisë Kundër Piraterisë, Bllokadave dhe Akteve të Tjera Ndërkombëtare të Paligjshme" u prezantua të hënën nga ligjvënësi pro-qeveritar Giuseppe Alessandrello.
Presidenti i Asamblesë Kombëtare, Jorge Rodriguez, ka thënë në fund të seancës se projektligji do t'i dërgohet ekzekutivit për miratim dhe do të hyjë në fuqi sapo të publikohet në Gazetën Zyrtare.
Uashingtoni ka rritur presionin mbi qeverinë e presidentit, Nicolas Maduro, në muajt e fundit, duke përfshirë rritjen e një grumbullimi ushtarak në Karaibe dhe vrasjen e dhjetëra njerëzve në sulme ndaj anijeve për të cilat thotë, pa dhënë prova, se po trafikojnë drogë jashtë brigjeve të saj.
Autoritetet amerikane thonë se operacionet janë pjesë e përpjekjeve për të luftuar shmangien e sanksioneve dhe trafikimin e drogës.
Maduro thotë se Shtetet e Bashkuara po kërkojnë të minojnë ekonominë e Venezuelës dhe ta largojnë atë nga pushteti.