-
Превод: Флутура Гаши-Мехмети
- 23 декември 2025 21:23 часот
- Споделете на:
Националното собрание на Венецуела, кое е контролирано од владејачката партија, во вторник едногласно одобри закон со кој се дозволуваат затворски казни до 20 години за секој што промовира или финансира она што го опишува како пиратство или блокади.
Законот, кој вклучува „други меѓународни злосторства“, доаѓа по неодамнешните американски акции против испораките на венецуелска нафта, објави Ројтерс.
Крајбрежната стража на САД заплени санкциониран супертанкер што превезуваше венецуелска сурова нафта претходно овој месец и се обиде да заплени уште два брода што се движеа кон Венецуела во текот на викендот, соопштија американски официјални лица.
Запленувањата го означуваат најсилниот удар на Вашингтон врз државната нафтена компанија PDVSA откако Министерството за финансии воведе санкции врз поранешните трговски партнери на нафтената компанија, две подружници на рускиот „Роснефт“, во 2020 година, принудувајќи ја да го намали производството и извозот. PDVSA веќе беше под санкции од 2019 година.
Предлог-законот „Закон за гарантирање на слободата на навигација и трговија против пиратство, блокади и други меѓународни незаконски дејствија“ беше поднесен во понеделник од провладиниот пратеник Џузепе Алесандрело.
Претседателот на Националното собрание, Хорхе Родригез, на крајот од седницата изјави дека нацрт-законот ќе биде испратен до извршната власт на одобрување и ќе стапи на сила штом ќе биде објавен во Службен весник.
исто така
САД во потрага по уште еден танкер за нафта крај брегот на Венецуела
Вашингтон го зголеми притисокот врз владата на претседателот Николас Мадуро во последните месеци, вклучително и зголемување на военото присуство на Карибите и убивање десетици луѓе во напади врз бродови за кои тврди, без да даде докази, дека шверцуваат дрога покрај неговиот брег.
Американските власти велат дека операциите се дел од напорите за борба против избегнувањето на санкциите и трговијата со дрога.
Мадуро вели дека САД се обидуваат да ја поткопаат економијата на Венецуела и да го отстранат од власт.
