Forcat ushtarake amerikane kanë marrë të martën nën kontroll anijen e shtatë cisternë të lidhur me Venezuelën, si pjesë e përpjekjeve të administratës Trump për të marrë kontrollin e naftës së vendit të Amerikës së Jugut.
Komanda Jugore e SHBA-së ka thënë në një postim në mediat sociale se forcat amerikane kapën anijen motorike Sagitta "pa incidente" dhe se cisterna po vepronte në kundërshtim me "karantinën e vendosur të anijeve të sanksionuara në Karaibe" të presidentit Donald Trump.
Komanda ushtarake nuk ka thënë nëse Roja Bregdetare e SHBA-së ka marrë kontrollin e cisternës siç ka ndodhur në sekuestrimet e mëparshme.
Sagitta është një cisternë me flamur liberian dhe regjistrimi i saj thotë se është në pronësi dhe menaxhohet nga një kompani në Hong Kong. Anija transmetoi vendndodhjen e saj për herë të fundit më shumë se dy muaj më parë kur doli nga Deti Baltik në Evropën Veriore.
Cisterna u sanksionua nga Departamenti i Thesarit i SHBA-së sipas një urdhri ekzekutiv që lidhet me pushtimin rus të Ukrainës në vitin 2022.
Postimi nga Komanda Jugore e SHBA-së, tregonte se anija kishte marrë naftë nga Venezuela.
Që nga rrëzimi i presidentit të Venezuelës, Nicolas Maduro, nga SHBA-ja, në një sulm të papritur natën e 3 janarit, administrata Trump ka vendosur të kontrollojë prodhimin, rafinimin dhe shpërndarjen globale të produkteve të naftës së Venezuelës.
Zyrtarët në administratën republikane të Trump e kanë bërë të qartë se e shohin sekuestrimin e cisternave si një mënyrë për të gjeneruar para, ndërsa synojnë të rindërtojnë industrinë e dëmtuar të naftës së Venezuelës dhe të rifuqizojnë ekonominë e saj.