Rreth 90 milionë euro humbjet nga grabitja në muzeun e Luvrit

Humbja financiare nga grabitja më dramatike e Francës në dekada është vlerësuar në gati 90 milionë euro, teksa kreu i Luvrit përgatitet të përballet me pyetje të vështira se si hajdutët arritën të vidhnin stoli me vlerë të madhe në mes të ditës.

Ndërsa policia po vazhdon kërkimet për bandën kriminale pas grabitjes së madhe të dielën, prokurorja e Parisit, Laure Beccuau, i ka thënë transmetuesit RTL se kuratori i muzeut kishte vlerësuar humbjet në 88 milionë euro, raporton The Guardian.

Presidentja e muzeut, Laurence des Cars, pritet t'u përgjigjet pyetjeve nga komiteti i kulturës i Parlamentit të mërkurën pasdite, tre ditë pas grabitjes shtatëminutëshe që synonte xhevahiret e kurorës së Francës.

Një bandë prej katër hajdutësh hyri me forcë në galerinë Apollo të Luvrit menjëherë pasi muzeu u hap të dielën në mëngjes, duke përdorur një vinç mobiljesh dhe duke ikur me tetë stoli të epokës Napoleonike.

Është e paqartë nëse muzeu, i cili u mbyll menjëherë pas grabitjes dhe mbeti i mbyllur të hënën dhe të martën, do të rihapet të mërkurën.

Pritet që Des Cars t'u përgjigjet pyetjeve në lidhje me shpejtësinë me të cilën hajdutët arritën të thyenin një dritare të katit të parë, cilësinë e vitrinave që mbanin stolitë dhe mungesën e dukshme të një njësie reagimi të shpejtë për të penguar hajdutët.

Duke folur në asamblenë kombëtare të martën, ministrja e Kulturës, Rachida Dati, mbrojti muzeun dhe hodhi poshtë spekulimet se kamerat e sigurisë nuk kishin funksionuar siç duhet. 

"Aparati i sigurisë i muzeut të Luvrit nuk dështoi, ky është një fakt. Aparati i sigurisë i muzeut të Luvrit funksionoi", ka thënë ajo.

Megjithatë, ajo ka shtuar se një pjesë e buxhetit për rinovimin e Luvrit tani do t'i dedikohet rinovimit të sistemit të tij të sigurisë, duke përfshirë kamerat e reja CCTV.