Qyteti i Gazës do të shkatërrohet, paralajmëron ministri izraelit

Ministri izraelit i Mbrojtjes, Israel Katz, ka paralajmëruar të premten se qyteti i Gazës mund të shkatërrohet nëse grupi militant palestinez Hamas nuk i pranon kushtet e Izraelit, teksa shteti hebraik po përgatitet për zgjerimin e ofensivës në këtë zonë të enklavës.

Katzi ka deklaruar se qyteti më i madh në Rripin e Gazës mund të “kthehet në Rafah dhe Beit Hanoun” – zona këto që janë shndërruar në rrënoja përgjatë zhvillimit të luftës.

“Portat e ferrit së shpejti do të hapen mbi kokat e vrasësve dhe përdhunuesve të Hamasit në Gazë – derisa ata të pranojnë kushtet e Izraelit për t’i dhënë fund luftës”, ka shkruar ai në rrjetin social X.

Mes tjerash, Katzi i ka ripërsëritur kërkesat e Izraelit për marrëveshje të armëpushimit, e që kanë të bëjnë me lirimin e menjëhershëm të të gjitha pengjeve të mbajtura në Gazë dhe çarmatosjen e plotë të Hamasit, ka raportuar AP.

Nga ana tjetër, zyrtarët e Hamasit kanë deklaruar se do ta pranojnë lirimin e pengjeve në këmbim të përfundimit të luftës, mirëpo e kanë kushtëzuar opsionin e çarmatosjes me krijimin e një shteti palestinez.

Një ditë më parë, kryeministri izraelit, Benjamin Netanyahu, kishte deklaruar se Izraeli ishte i gatshëm të vazhdonte negociatat për lirimin e menjëhershëm të të gjitha pengjeve si dhe për ndërprerjen e luftës, porse vetëm në kushte që janë të pranueshme për të.

Tek ka folur me ushtarët afër kufirit të Izraelit me Gazën, Netanyahu ka thënë se qëndrimi i tij rreth planeve të miratuara për mposhtjen e Hamasit dhe riokupimin e qytetit të Gazës ka mbetur i pandryshuar. 

Si pasojë e këtyre planeve, mijëra palestinezë janë detyruar të largohen nga shtëpitë e tyre përderisa tanket izraelite i janë afruar qytetit të Gazës gjatë 10 ditëve të fundit. 

E gjatë ditës së premte (sot) pritet që organizata e mbështetur nga OKB-ja, Klasifikimi i Integruar i Sigurisë Ushqimore (IPC), të publikojë përditësimin më të ri për situatën e urisë në Rripin e Gazës.

Ky trup monitorues i sigurisë ushqimore pati deklaruar muajin e kaluar se “skenari më i keq i urisë” është duke “u zhvilluar në Rripin e Gazës”.

Në Ministrinë e Shëndetësisë në Gazë kanë raportuar se 271 persona kanë vdekur nga “uria dhe kequshqyerja” që prej 7 tetorit të 2023-tës, ndër ta 112 fëmijë.

Agjencitë humanitare kanë bërë thirrje që Izraeli të lehtësojë qasjen për më shumë ndihma në Rripin e Gazës, duke paralajmëruar se mungesa e ushqimit dhe ujit mund të përshkallëzohet në uri masive.

Autoritetet izraelite i kanë mohuar pretendimet se ka krizë të urisë në enklavën palestineze. Vetë kryeministri izraelit, Benjamin Netanyahu, kishte deklaruar më herët këtë muaj se “politika e Izraelit gjatë gjithë luftës ka qenë të parandalojë një krizë humanitare, ndërsa politika e Hamasit ka qenë ta krijojë atë”.