-
Përktheu:
Flutura Gashi-Mehmeti
- 14 gusht 2025 07:16
- Shpërndaje në:
Më shumë se 100 organizata kanë nënshkruar një letër të përbashkët duke i bërë thirrje Izraelit të ndalojë "armatimin e ndihmave" në Gaza, teksa "uria thellohet".
Grupet humanitare, përfshirë Oxfam dhe Medecins Sans Frontieres (MSF), thonë se po u thuhet gjithnjë e më shumë se "nuk janë të autorizuar" për të ofruar ndihmë, përveç nëse i përmbahen rregulloreve më të rrepta izraelite, raporton BBC.
Grupet rrezikojnë të ndalohen nëse "delegjitimojnë" shtetin e Izraelit ose nuk japin informacion të detajuar në lidhje me stafin palestinez, thuhet në letër.
Izraeli mohon se ka kufizime për ndihmën dhe thotë se rregullat, të futura në mars, sigurojnë që puna e ndihmës të kryhet në përputhje me "interesat kombëtare" të Izraelit.
Sipas letrës së përbashkët, shumica e organizatave të mëdha ndërkombëtare joqeveritare (OJQ) nuk kanë qenë në gjendje të dorëzojnë asnjë kamion të vetëm me furnizime që nga 2 marsi.
Ato thonë se autoritetet izraelite "kanë refuzuar kërkesat nga dhjetëra organizata joqeveritare për të sjellë mallra", duke përmendur rregullat e reja. Më shumë se 60 kërkesa u refuzuan vetëm në korrik.
Pamundësia e grupeve të ndihmës për të ofruar ndihmë ka "lënë spitalet pa furnizime bazë, fëmijë, persona me aftësi të kufizuara dhe të moshuar që vdesin nga uria dhe sëmundjet e parandalueshme", thuhet në deklaratë
"Anera ka furnizime shpëtimtare me vlerë mbi 7 milionë dollarë të gatshme për të hyrë në Gaza - duke përfshirë 744 ton oriz, të mjaftueshëm për gjashtë milionë vakte, të bllokuara në Ashdod vetëm disa kilometra larg", ka thënë Sean Carroll, drejtor Ekzekutiv i Ndihmës Amerikane për Refugjatët e Lindjes së Afërt (Anera).
Udhëzimet e reja të prezantuara në mars përditësojnë mënyrën se si grupet e ndihmës duhet të regjistrohen për të ruajtur statusin e tyre brenda Izraelit, së bashku me dispozita që përshkruajnë se si aplikimet e tyre mund të refuzohen ose regjistrimi të revokohet.
Regjistrimi mund të refuzohet nëse autoritetet izraelite vlerësojnë se një grup mohon karakterin demokratik të Izraelit ose "promovon fushata delegjitimizimi" kundër vendit.
"Për fat të keq, shumë organizata ndihme shërbejnë si mbulesë për aktivitete armiqësore dhe ndonjëherë të dhunshme", ka thënë ministri i Diasporës i Izraelit, Amichai Chikli, për agjencinë e lajmeve Agence France-Presse.