Gjykata siriane dënon me vdekje në mungesë ish-diktatorin, Bashar al-Assad

Një gjykatë siriane ka dënuar me vdekje në mungesë ish-diktatorin e rrëzuar, Bashar al-Assad, pasi e ka shpallur fajtor për kryerjen e krimeve të luftës dhe krimeve kundër njerëzimit gjatë luftës civile në vend.

Ky është dënimi i parë ndaj Assadit, i cili është arratisur nga Damasku drejt Moskës së bashku me familjen e tij, pasi regjimi i tij u rrëzua në dhjetor 2024, duke i dhënë fund sundimit pesëdekadësh të familjes së tij.

Edhe kushëriri i Assadit dhe ish-kreu i sigurisë politike në provincën Deraa, në jug të Sirisë, Atef Najib, është dënuar me vdekje. Ai është shfaqur në sallën e gjyqit i veshur me uniformë burgu, brenda një kafazi, ndërsa gjyqtari lexonte dënimin e tij.

Deraa konsiderohet gjerësisht si vendlindja e kryengritjes kundër sundimit të Assadit.

Në mars të vitit 2011, ndalimi dhe torturimi i dyshuar i një grupi adoleshentësh, të akuzuar se kishin shkruar grafite kundër qeverisë, shkaktoi protesta në qytet. Protestat u përballën me një shtypje të dhunshme nga forcat e sigurisë.

Edhe Botë 1 o. më parë Kërcënimi nga Irani: Trumpi ndërroi fshehurazi aeroplanin, u fsheh në kamion mallrash

Kjo përgjigje ndihmoi në ndezjen e protestave mbarëkombëtare, të cilat u përshkallëzuan në një luftë civile ku u vranë qindra mijëra njerëz.

Qeveria e përkohshme e Sirisë ka nisur në fillim të këtij viti të gjykonte zyrtarë të lidhur me regjimin e Assadit, i cili e sundoi vendin për më shumë se 50 vjet.

Najib është një nga zyrtarët më të lartë që është vënë në gjyq.

Ai është shpallur fajtor për krime, përfshirë vrasje, “vrasjen e qëllimshme të fëmijëve nën moshën 15 vjeç” dhe “torturë që ka çuar në vdekje”.

Gjykata ka dënuar gjithashtu me vdekje në mungesë gjashtë ish-zyrtarë ushtarakë dhe të sigurisë, mes tyre edhe vëllain më të vogël të Bashar al-Assadit, Maher. Ai drejtonte Divizionin e Katërt elitar të ushtrisë dhe gjithashtu është arratisur drejt Moskës kur regjimi ka rënë.

Mes të dënuarve të tjerë është edhe ish-ministri i Mbrojtjes, Fahd al-Freij.

Edhe Botë 4 o. më parë SHBA-ja anuloi 175 mijë viza gjatë administratës së Trumpit

Mbetet e paqartë nëse autoritetet e reja të Sirisë do të arrijnë të sigurojnë ekstradimin e Bashar dhe Maher al-Assadit nga Moska.

Ky nuk është veprimi i parë i ndërmarrë kundër Assadit nga udhëheqja e re e Sirisë.

Një urdhër-arresti është lëshuar ndaj tij dhjetorin e kaluar, nën akuzat për vrasje dhe torturë.

Ai është largua drejt Rusisë ndërsa forcat nën drejtimin e Ahmed al-Sharaa-s – tashmë president i Sirisë, morën pushtetin në një fushatë të shpejtë 11-ditore, e cila rrëzoi dinastinë Assad.

Që atëherë, qeveria e re ka arrestuar një numër të madh ish-zyrtarësh dhe pjesëtarësh të forcave të sigurisë, megjithëse shumica e figurave të larta të regjimit të vjetër, përfshirë vetë Assadin, vazhdojnë të jenë të paarritshëm në Rusi.

Assad kishte ardhur në pushtet në vitin 2000, pas vdekjes së babait të tij. Djali i dytë i Hafez al-Assadit, ai nuk ishte i destinuar të bëhej sundimtar i Sirisë derisa vëllai i tij, Basil, vdiq në një aksident automobilistik në vitin 1994.

Edhe Botë 5 o. më parë “Vejushat e zeza”: Martesat me rekrutët rusë për kompensim pas vdekjes së tyre

Si pjesë e pakicës alavite, ai vazhdoi të favorizonte dominimin e kësaj pakice në shumë poste në ushtri, në strukturat e sigurisë dhe në agjencitë e inteligjencës.

Pjesa më e madhe e sundimit të tij u përcaktua nga lufta civile.