-
Përktheu:
Flutura Gashi-Mehmeti
- 4 nëntor 2025 20:53
- Shpërndaje në:
Administrata Trump po punon për një rezolutë të Këshillit të Sigurimit të Kombeve të Bashkuara për të vendosur një forcë shumëkombëshe në Gazë, për të mbështetur marrëveshjen e armëpushimit të ndërmjetësuar nga SHBA-ja, sipas një burimi të njohur me planet.
Detajet e një force të përkohshme sigurie përgjegjëse për demilitarizimin e Gazës dhe trajnimin e një force të re policore palestineze janë duke u diskutuar si pjesë e punës për rezolutën, sipas burimit, raporton CNN.
Trupat amerikane nuk do të jenë pjesë e forcës në terren në Gazë, por do të veprojnë në një rol koordinues jashtë territorit.
Draftet e hershme të rezolutës janë ndarë me anëtarët e tjerë të Këshillit të Sigurimit, ka shtuar burimi.
Ngritja e një force ndërkombëtare stabilizimi (ISF) është pjesë e rëndësishme e planit 20-pikësh të armëpushimit të Trumpit në Gazë, por shumë nga kombet që po shqyrtojnë pjesëmarrjen e kanë bërë të qartë se do të bashkohen vetëm sipas mandatit të një rezolute të OKB-së.
Sekretari i Shtetit i SHBA-së, Marco Rubio, ka thënë gjatë vizitës në Izrael muajin e kaluar se disa nga pjesëmarrësit potencialë do t'i bashkoheshin forcës vetëm nëse ajo do të kishte "një lloj mandati ndërkombëtar", duke shtuar se kjo mund të merrte formën e një rezolute të OKB-së ose një "marrëveshjeje ndërkombëtare".
Sapo të krijohet, ISF-ja do të veprojë nën një komandë të unifikuar në koordinim të ngushtë me Izraelin dhe Egjiptin, ka thënë burimi për CNN.
SHBA-ja ka krijuar një qendër koordinimi në Izraelin jugor për të menaxhuar fazat e ardhshme të planit të armëpushimit në Gazë, duke përfshirë përpjekjet e planifikuara të rindërtimit dhe hyrjen e ndihmës humanitare.
Sipas Komandës Qendrore të SHBA-së, gati 40 vende dhe organizata të ndryshme ndërkombëtare kanë përfaqësim në qendrën e koordinimit.