-
Превод: Флутура Гаши-Мехмети
- 4 ноември 2025 20:53 часот
- Споделете на:
Администрацијата на Трамп работи на резолуција на Советот за безбедност на Обединетите нации за распоредување мултинационални сили во Газа за поддршка на договорот за прекин на огнот постигнат со посредство на САД, според извор запознаен со плановите.
Деталите за привремена безбедносна сила одговорна за демилитаризација на Газа и обука на нови палестински полициски сили се дискутираат како дел од работата на резолуцијата, според изворот, пренесува Си-Ен-Ен.
Американските трупи нема да бидат дел од силите на терен во Газа, туку ќе дејствуваат во координативна улога надвор од територијата.
Првичните нацрти на резолуцијата се споделени со другите членови на Советот за безбедност, додаде изворот.
Воспоставувањето на меѓународни стабилизациски сили (ISF) е клучен дел од 20-точкиот план на Трамп за прекин на огнот во Газа, но многу од земјите што размислуваат за учество јасно ставија до знаење дека ќе се приклучат само под мандат на резолуција на ОН.
Американскиот државен секретар Марко Рубио изјави за време на посетата на Израел минатиот месец дека некои од потенцијалните учесници би се придружиле на силите само ако имаат „некаков вид меѓународен мандат“, додавајќи дека тоа би можело да биде во форма на резолуција на ОН или „меѓународен договор“.
Откако ќе бидат воспоставени, ISF ќе дејствуваат под обединета команда во тесна координација со Израел и Египет, изјави изворот за Си-Ен-Ен.
САД воспоставија координативен центар во јужен Израел за управување со следните фази од планот за прекин на огнот во Газа, вклучувајќи ги планираните напори за реконструкција и внесување на хуманитарна помош.
Според Централната команда на САД, речиси 40 земји и разни меѓународни организации имаат претставништво во координативниот центар.