Edhe Partia Demokratike e Kosovës ka thënë se për një takim me kryeministrin Albin Kurti për çështjen e presidentit mund të takohen vetëm pas vendimit të Gjykatës Kushtetuese.
Në një komunikatë për media, partia më e madhe opozitare ka thënë se është e hapur për komunikim dhe dialog politik, por ka shtuar se për këtë duhet të pritet 31 marsi.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Partia Demokratike e Kosovës e falënderon kryeministrin Albin Kurti për ftesën për takim dhe rithekson se mbetet e hapur për komunikim dhe dialog politik sa herë që kjo i shërben stabilitetit institucional dhe interesit të vendit. Megjithatë, në rrethanat aktuale, duke pasur parasysh se Gjykata Kushtetuese ka vendosur Masë të Përkohshme që pezullon procesin e zgjedhjes së Presidentit dhe çdo veprim të mëtejshëm të Kuvendit në këtë drejtim, PDK vlerëson se është e domosdoshme të pritet vendimi përfundimtar i Gjykatës, i cili pritet deri më 31 mars dhe që do të qartësojë hapat e mëtejmë institucionalë. Partia Demokratike e Kosovës beson se respektimi i vendimeve të Gjykatës Kushtetuese dhe i procedurave institucionale është mënyra më e përgjegjshme për të garantuar stabilitet politik dhe institucional në vend”, thuhet në reagim të PDK-së.
Gjatë ditës, kryetari i Vetëvendosjes, Albin Kurti, njoftoi se do t’u çojë ftesë liderëve të partive opozitare për takim javën e ardhshme për të diskutuar për çështjen e presidentit.
Më herët, edhe Lidhja Demokratike e mirëpriti ftesën, por tha se po e pret vendimin e Gjykatës Kushtetuese.
Kushtetuesja e ka marrë në shqyrtim një ankesë të Lëvizjes Vetëvendosje dhe Qeverisë ndaj dekretit të presidentes Vjosa Osmani për shpërndarjen e Kuvendit pas dështimit që të zgjedhë presidentin e ri deri më 5 mars. Kushtetuesja ka pezulluar punën e Kuvendit dhe çdo veprim të Osmanit në drejtim të zgjedhjeve të reja deri më 31 mars.
Kurti kishte takuar para 5 marsit disa herë liderët e PDK-së dhe LDK-së por nuk ishte arritur dakordimi për kandidat konsensual për president. Në fund, VV-ja propozoi Glauk Konjufcën dhe Fatmire Mullhaxhën, por në seancën e ftuar nuk pati kuorum dhe nuk nisi votimi për president.
