Mbështete KOHËN. Ruaje të vërtetën
Arbëri

Mblidhet PDK-ja

Partia Demokratike e Kosovës - PDK

Partia Demokratike e Kosovës është mbledhur për të diskutuar për gjendjen aktuale. 

Takimi i Kryesisë dhe po ashtu Grupit Parlamentar vjen vetëm një ditë pasi kryetari i partisë Bedri Hamza zhvilloi takimin e radhës me kreun e Lëvizjes Vetëvendosje dhe kryeministrin Albin Kurti. 

Takimi ka nisur nga ora 14:00 në selinë e PDK-së e pas saj pritet deklarim i kryetarit Hamza, kanë për KOHËN nga PDK-ja.  Hamza u deklarua edhe para takimit. 

Më 6 tetor është afati i fundit për zgjedhjen e presidentit. 

PDK-ja ka insistuar të bëhet plotësim-ndryshimi i Ligjit për Gjykatën Speciale e më pas ka shprehur gatishmëri të bisedojë për presidentin. 

Ekzekutivi i Kosovës të premten mbrëma i ka hapur rrugë nismës së propozuar nga Partia Demokratike e Kosovës (PDK) për ndryshimin e Ligjit për Dhomat e Specializuara.
Në një mbledhje elektronike, Qeveria e Kosovës ka miratuar vendimin. Sipas njoftimit zyrtar, është konstatuar se nuk ekzistojnë pengesa ligjore për procedimin e këtij projektligji.

Propozimi i Partisë Demokratike të Kosovës për ta ndryshuar Ligjin për Gjykatën Speciale përmban dispozita që synojnë t’ia kufizojnë mandatin lëndor, edhe kohor e edhe territorial kësaj gjykate me seli në Hagë.

Hamza: Optimist se Ligji për Specialen do të votohet, PDK-ja e hapur për çështjen e presidentit

1 muaj më parë / 4 tet 2026 18:00 Nga: Rrezon Gashi
hamza

Kryetari i Partisë Demokratike të Kosovës (PDK), Bedri Hamza, ka deklaruar se të hënën në seancën e Kuvendit të Kosovës pritet të procedohet projektligji për plotësim-ndryshimin e ligjit për Dhomat e Specializuara. Ai ka thënë se është optimist se ligjin do ta përkrahin të gjithë deputetët.  Tutje ka folur edhe për çështjen e presidentit. Ka shtuar se nuk kanë kërkuar të jenë pjesë e Qeverisë, por nuk janë të mbyllur për t’i dhënë vendit president.  

“Ne nuk kemi kërkuar asnjëherë të jemi pjesë e qeverisë por nuk jemi të mbyllur dhe përjashtues për t’i dhënë vendit president. Nesër jam optimist se ligjin do ta përkrahin të gjithë deputetët, edhe i lus edhe i ftoj të gjithë deputetët e Kuvendit të Republikës së Kosovës që të jenë në mbështetje të këtij projektligji”, deklaroi Hamza.

Ai e cilësoi projektligjin si të rëndësishëm për procesin e drejtësisë, duke theksuar se qëndrimi i tij dhe i PDK-së nuk është kundër drejtësisë, por kundër asaj që ai e konsideron padrejtësi në proceset e Dhomave të Specializuara.

“Është një ligj tepër i rëndësishëm, është një ligj që kërkon të vendosë drejtësi. Nuk jemi kundër drejtësisë, jemi kundër padrejtësisë”, tha ai.

Sipas Hamzës, në procesin e deritanishëm ka pasur, siç u shpreh ai, mungesë transparence, llogaridhënieje dhe mbikëqyrjeje. Ai kritikoi gjithashtu vendimin që, sipas tij, prek historinë, të tashmen dhe të ardhmen e Kosovës.

“Kemi parë mungesë transparence, mungesë llogaridhënie, mungesë mbikëqyrje, dhe kemi një vendim të padrejtë. Një vendim ku gjykohet historia, e tashmja dhe e ardhmja e Kosovës”, deklaroi Hamza.

Hamza tha se synimi është që procesi i apelimit të zhvillohet brenda Dhomave të Specializuara dhe që vendimet të bazohen në prova dhe fakte.

“Ne po duam me vazhdu me besu në drejtësi. Dhe për këtë qëllim, Apeli do të fillohet brenda Dhomave të Specializuara, në kuadër të Dhomave të Specializuara, dhe ne presim që të ketë një vendim të drejtë, bazuar në fakte, në prova, jo thashetheme”, tha ai.

Duke folur për akuzën e “ndërmarrjes së përbashkët kriminale”, Hamza tha se, sipas tij, personat e përfshirë nuk duhet të gjykohen për krime që nuk janë provuar.

“Nuk mundet dhe nuk qëndron ‘ndërmarrja e përbashkët kriminale’, ata njerëz janë të pafajshëm. Nuk munden të gjykohen njerëzit për krime që s’i kanë bërë. Krimet duhet të faktohen”, u shpreh ai.

Kryetari i PDK-së theksoi se nuk kundërshton të drejtën e viktimave për drejtësi dhe hetimin e krimeve, por kërkoi që përgjegjësia penale të mbështetet në prova.

“Nuk jemi kundër asaj na që viktimat kërkojnë të drejtën e tyre. Nuk jemi kundër asaj na që krimet të hulumtohen, të faktohen, të provohen deri në fund. Deri në fund”, tha Hamza.

Në fund, ai theksoi se iniciativa nuk synon shpërbërjen e Dhomave të Specializuara, por vendosjen e mekanizmave që, sipas tij, do ta rikthenin procesin brenda kornizave juridike dhe ligjore.

“Ne nuk po e shpërbëjmë Gjykatën apo Dhomat e Specializuara, por po vendosim mekanizma, po e vendosim, po e kthejmë brenda normave juridike dhe ligjore”, deklaroi Hamza.

Ai shprehu bindjen se projektligji do të marrë mbështetjen e deputetëve dhe se procedurat e tij do të përfundojnë brenda Kuvendit.

Hamza: Fillimisht Ligji për Specialen, por nëse dikush ka plan me çu vendin në zgjedhje është temë tjetër

1 muaj më parë / 4 tet 2026 14:34
Bedri Hamza

Kryetari i Partisë Demokratike të Kosovës, Bedri Hamza ka ftuar në takim mbledhje Grupit Parlamentar të kësaj partie për t’i njoftuar mbi takimin e djeshëm mes tij dhe kryetarit të Vetëvendosjes, Albin Kurti.

Para takimit, Hamza tha se qëndrimi i PDK-së nuk është vetëm për ta sepse sipas tij, UÇK është përtej çdo subjekti politik.

Hamza: Nëse dikush tjetër ka plan me çu vendin në zgjedhje, është send tjetër

“Kërkesa dhe qëndrimi i PDK-së është kjo nuk është për PDK-në. Sepse UÇK është më e madhe se PDK-ja. Historia, e tashmja dhe e ardhmja e Kosovës është më e madhe se gjithçka. Kosova është më e madhe se ne. Ne po thoshim: me u aprovu ligji në të dyja leximet, pastaj me u propozu emri për president dhe me u zgjedh presidenti e me i shmang zgjedhjet. Nëse dikush tjetër ka plan me çu vendin në zgjedhje, është send tjetër”, ka thënë Hamza, raporton KosovaPress. 

Deputetja e PDK-së, Ganimete Musliu para mbledhjes së Grupit Parlamentar dhe të Kryesisë tha se PDK asnjëherë nuk i ka ikur përgjegjësisë shtetërore.

Musliu u shpreh se po mundohen të bëjnë më të mirë për Kosovën.

“Partia Demokratike e Kosovës asnjëherë nuk i ka ikur përgjegjësisë shtetërore e institucionale, nuk i ikën as sot. Jemi duke u munduar me bë më të mirën për Kosovën. Në rrethanat të cilat jemi, gjithmonë jemi duke u munduar me bë më të mirën për Kosovën, prandaj në vazhdën e angazhimit tonë kemi dhe takimin e sotëm”, tha Musliu.

Ajo u shpreh se pas takimit do të tregoj se çka u diskutua në detaje dhe theksoi se çështja që nuk pret është ligji për Dhomat e Specializuara.

“Tani hipotetike asnjë përgjigje nuk ju jap unë. Kur të dal prej mbledhjes ju tregoj çfarë kemi folur në mbledhje, por përderisa nuk jemi futur në mbledhje është kjo. Tani edhe njëherë, nuk i ikim asnjëherë përgjegjësisë shtetërore si Partia Demokratike e institucionale, jemi duke u munduar, në rrethanat të cilat jemi, jemi duke u munduar me bë më të mirën për Kosovën. Ajo çka nuk pret momentalisht është ligji për dhomat e specializuara, të tjerat presin”, shtoi ajo.

Kryetari i PDK-së, Bedri Hamza dje është takuar me kreun e VV-së, Albin Kurti, por që nuk ka rezultuar me një marrëveshje.

Krahas çështjes së presidentit, PDK-ja po insiston që deri më 6 tetor të miratohet në dy leximet në Kuvendin e Kosovës edhe Projektligji për ndryshimin e Ligjit për Specialen i proceduar nga qeveria të premten.

Ndërkohë, në një aktgjykim të 23 shtatorit, Gjykata Kushtetuese e Kosovës sqaroi se afati 60-ditor për zgjedhjen e presidentit ka nisur më 8 gusht, nga dita kur u konstituua Kuvendi, dhe përfundon më 6 tetor.