Ministria e Shëndetësisë, në bashkëpunim me Shërbimi Spitalor Klinik dhe Universitar të Kosovës, kanë bërë furnizimin me barna në QKMF-në e Hanit të Elezit, në kuadër të kërkesave për ndihmë emergjente, sa i përket dyshimeve për helmim nga uji.
Sipas njoftimit, në QKMF-në e Hanit të Elezit sot janë dërguar: Naci 500ml. 500 copë, Hyoscine amp. 60 copë dhe Metoclopramide amp. 150 copë
“Po ashtu, sa i përket situatës së krijuar të gjitha komunat për rreth Hani të Elezit, si Vitia, Ferizaj etj, janë në gjendje gatishmërie për të ndihmuar komunën e Hanit të Elezit, për tejkalimin e kësaj situate, ku dyshohet se disa qytetarë janë helmuar më ujë të pijes”, thuhet në njoftim.
Ministria e Shëndetësisë ka njoftuar se bashkë me institucionet relevante janë duke e përcjellë gjendjen në komunën e Hanit të Elezit dhe në atë të Kaçanikut.
Rreth 120 persona në Han të Elezit kanë kërkuar ndihmë mjekësore, pasi dyshohet të jenë helmuar nga uji.
Javën e kaluar mbi 200 persona në Kaçanik kanë marrë trajtim mjekësor për shkak të helmimeve, që kanë rezultuar të jenë për shkak të ujit të pijshëm që nuk i ka plotësuar standardet.
© KOHA. Të gjitha të drejtat janë të rezervuara.
