Komuna e Hanit të Elezit i ka kërkuar me urgjencë Ministrisë së Shëndetësisë, që ta furnizojë me infuzione për menaxhim të situatës së krijuar, nën dyshimet për helmim nga uji. Për shkak të mungesës së infuzioneve nga MSH-ja, ky institucion i ka kërkuar ndihmë Qendrës Klinike e Universitare të Kosovës (QKUK).
Siç mëson KOHA, Qendra Kryesore e Mjekësisë Familjare (QKMF) në Han të Elezit, ka dërguar disa herë kërkesë që të furnizohet me infuzione.
“Mungesa e resurseve humane po shkakton vështirësi në ofrimin e shërbimeve cilësore shëndetësore, dhe po shkakton mbingarkesë në punë, si për mjekët, ashtu edhe për infermierët. Kërkojmë mbështetje edhe në këtë aspekt”, thuhet në kërkesën e QKMF-së “Menduh Kaloshi”, të siguruar nga KOHA.
Që nga e diela, afro 120 persona kanë kërkuar ndihmë mjekësore në Qendrën e Mjekësisë Familjare në Han të Elezit. Me simptoma vjellje, barkqitje dhe marramendje, banorë të fshatit Gorancë të kësaj Komune, po dyshojnë që janë shkaktuar nga uji i pijshëm.
Të hënën ekipet e Institutit Kombëtar të Shëndetit Publik ka marrë mostra për të zbuluar shkakun e këtyre simptomave. Sipas IKSHP-së, në analizat fizio-kimike, thuhet se uji është brenda parametrave normalë.
© KOHA. Të gjitha të drejtat janë të rezervuara.
