Dyqind persona kanë kërkuar ndihmë mjekësore në Han të Elezit

Dyqind persona kanë kërkuar ndihmë mjekësore në Han të Elezit për shkak të simptomave që u janë shfaqur ditëve të fundit, e që dyshohet se janë shkaktuar nga uji i pijes.

Sipas njoftimit nga Ministria e Shëndetësisë, ky institucion dhe SHSKUK-ja kanë ndihmuar QKMF-në e Hanit të Elezit me furnizime e medikamente dhe materiale shpenzuese të nevojshme të kërkuara si nevoja emergjente.

“Zëvendësministri Arsim Berisha u njoftua nga autoritetet lokale shëndetësore të Hanit të Elezit se nga fillimi i ankesave të qytetarëve deri në ora 12 të ditës së sotme, ekipet mjekësore kanë vizituar 195 pacientë, kurse pas orës 12:00, 5 pacientë. Ekipet e IKSHPK-së ndërkaq, kanë marrë edhe sot mostra për analizë laboratorike të ujit pas dyshimeve për intoksikim të ujit”, thuhet në njoftim e MSH-së.

Sipas njoftimit, me qëllim të përballimit të situatës dhe ofrimit të shërbimeve për të gjithë qytetarët me ankesa, QKMF-ja e Hanit të Elezit është mbështetur nga ekipet e Kujdesit Parësor Shëndetësor nga Komuna e Ferizajt dhe Komuna e Vitisë.

“Agjencia e Menaxhimit të Emergjencave në kuadër të MPB-së, përmes cisternave, ka siguruar ujë të pijes për banorët e zonave ku qytetarët kanë pasur probleme shëndetësore, derisa IKSHPK-ja të konfirmojë rezultatet e mostrave të marra për analizat e ujit”, thuhet në njoftim.

Edhe Arbëri 12 kor 2022 MSH-ja furnizon me barna QKMF-në e Hanit të Elezit

Ndërkohë, në Kaçanik është konfirmuar se uji ishte shkaktar për helmimin e mbi 200 personave. Analizat e ujit nga Hani i Elezit janë ende duke u testuar.