Cristiano Ronaldo mund ta luajë ndeshjen e fundit të tij me Juventusin.
Largimi i portugezit ka qenë lajm thuajse i përditshëm në muajt e fundit. Manchester City dhe Paris Saint-Germaini mund të jenë destinacion i tij.
Juventusi është takuar me menaxherin e Ronaldos, Jorge Mendesin, të enjten. Bisedimet kanë zgjatur rreth një orë e gjysmë, por pak është mësuar nga ai takim.
Ronaldo e hoqi fanellën duke iu gëzuar një goli të anuluar në vikendin e kaluar. Do të ketë një tjetër rast të shtunën kundër Empolit për një festë të tillë.
36-vjeçari Ronaldo e ka edhe një vjet në kontratë. Nuk ka raportime për nënshkrimin e një kontrate tjetër dhe Juventusi mund t’i ndajë rrugët me të.
Edhe
A është mbyllur epoka e Ronaldos te Portugalia?
Afati kalimtar veror mbyllet të martën dhe madje as lojtarët e skuadrës nuk kanë ide nëse Ronaldo do të jetë me ta edhe më tutje.
“Ai nuk më ka treguar asgjë për të ardhmen dhe nuk e dimë nëse do të qëndrojë por shpresoj që ai të jetë në skuadër për kohë të gjatë”, tha 19-vjeçari Kaio Jorge, i cili iu bashkua klubit nga skuadra braziliane Santos.
“Cristiano Ronaldo ka qenë burim i inspirimit për mua. Do të jem përkrah tij çdo ditë për të mësuar aq sa mundem nga ai”, përfundoi braziliani.
Ronaldo nuk ishte titullar në ndeshjen e parë të Juventusit kundër Udineses javën e kaluar. Kur hyri në pjesën e dytë, shënoi gol në kohën shtesë por u anulua dhe ndeshja u mbyll 2:2.
Si klubi ashtu edhe trajneri Massimiliano Allegri kanë insistuar se ishte vendim i trajnerit që Ronaldo të jetë në bankën e rezervistëve. Ronaldo e lëndoi krahun të mërkurën në stërvitje por pritet të jetë titullar ndaj Empolit.
Edhe
Ronaldo ftohet sërish nga Portugalia
Koha e Ronaldos te Juventusi do të gjykohet me ndjenja të përziera. Pesë herë fituesi i “Topit të Artë” u transferua nga Real Madridi në vitin 2018 për rekordin e klubit prej 100 milionë eurove, me synimin për ta fituar Ligën e Kampionëve.
Por Juventusi nuk i ka kaluar as çerekfinalet qëkur ai arriti në Itali dhe u eliminua në 1/8 e finales së kësaj gare në dy edicionet e fundit.
