Kampanja e nisur me mund në Prishtinë, përfundon në Tiranë për skuadrën e madhe holandeze

Më 19 maj të vitit të kaluar, Feyenoordi fitoi 2:0 ndaj Sparta Rotterdamit. Më pas më 23 maj fitoi 2:0 ndaj Utrechtit. Kështu e fitoi plejofin e kampionatit holandez për një vend në rundin e dytë kualifikues të Ligës së Konferencës, garës së re të UEFA-s që filloi të luhej në edicionin aktual, 2021/2022.

Nuk dukej ndonjë gjë e madhe kjo para një viti. Pakkush mund të ketë besuar se ekipi i njohur holandez do t’i shkonte deri në fund rrugëtimit në garën e re të UEFA-s, që është niveli i tretë evropian, pas Ligës së Kampionëve dhe Ligës së Evropës. Mëdyshjet mund të jenë rritur pasi Feyenoordi e luajti ndeshjen e parë në këtë garë ende jo shumë të panjohur. Feyenoordi udhëtoi për në Kosovë, përkatësisht në Prishtinë, për t’u përballur me Dritën e Gjilanit. Dhe ndeshja e luajtur para 2400 shikuesve në “Fadil Vokrri” më 22 korrik të vitit të kaluar, ishte e mundimshme për skuadrën holandeze. Përfundoi 0:0. Për Dritën ishte rezultat i madh, marrë për bazë faktin që përballë e kishte një skuadër të njohur të kampionatit holandez.

Feyenoordi avancimin tutje e siguroi vetëm në ndeshjen e dytë, të luajtur më 29 korrik në stadiumin “De Kuip” në Rotterdam. Në stadium ishin mbi 25 mijë shikues, ndërsa Feyenoordi fitoi 3:2. Madje fitoi me përmbysje të rezultatit, kurse golin e fitores e shënoi në minutën e 90-të. Guus Til kaloi në epërsi Feyenoordin në minutën e shtatë, ndërsa Marko Simonoski e Astrit Fazliu shënuan për epërsinë 2:1 të Dritës. Simonovski shënoi në minutën e 12-të, ndërsa Fazliu në minutën e 16-të. Til barazoi shifrat në minutën e 67-të, ndërsa golin e fitores e shënoi në minutën e 90-të.

“E kemi analizuar shumë kundërshtarin dhe e kemi pasur parasysh se do të kemi punë me një skuadër shumë të fortë. Përgëzoj lojtarët për angazhimin dhe jam i kënaqur me rezultatin. Pas këtij barazimi edhe në Holandë do të udhëtojmë për të treguar një paraqitje të mirë”, kishte thënë trajneri i Dritës, Ardian Nuhiu pas ndeshjes së parë.

Ajo që tha Nuhiu edhe ndodhi. Skuadra gjilanase edhe në Holandë u paraqit mirë. Edhe në sajtin e Feyenoordit ishte vlerësuar paraqitja e Dritës në Prishtinë e po ashtu ajo në Holandë.

Edhe Sport 24 maj 2022 Goli ndaj Feyenoordit i shërben Fazliut si frymëzim para finales së Kupës me Dritën

“Falë tre golave të Guus Til, Feyenoordi e mundi Dritën pas një ndeshjeje të vështirë”, kishte shkruar klubi holandez.

Dukshëm më lehtë Feyenoordi kaloi në rundin e tretë kualifikues. Shënoi dy fitore prej 3:0 ndaj Luzernit helvetik.

Bindës gjiganti holandez ishte edhe në ndeshjen e parë të rundit të plejofit. Fitoi 5:0 ndaj Elfsborgut suedez. Në ndeshjen e kthimit humbi 3:1.

Feyenoordi më pas fitoi grupin e Ligës së Konferencës ku ishin edhe Slavia Praga, Union Berlini e Maccabi Haifa.

Në një të tetën e finales e kaloi Partizanin e Beogradit. E mposhti 5:2 në Beograd dhe 3:1 në Rotterdam.

Edhe Sport 21 kor 2021 Drita do t’i gëzohej edhe barazimit në ndeshjen ndaj Feynoordit

Në çerekfinale kishte punë sërish me Slavia Pragën. Luajti 3:3 në shtëpi, para se të fitonte 3:1 në Pragë. Ndërkohë në gjysmëfinale Feyenoordi e kaloi Marseillen e Francës. Fitoi 3:2 në shtëpi më 28 prill, derisa të enjten mbrëma luajti pa gola në “Velodrome” të Marseilles, para 49 mijë shikuesve.

Ky rrugëtim i veçantë e Feyenoordit përfundon më 25 maj në Tiranë. Në finale të Ligës së Konferencës, skuadra holandeze takohet me Romën. Roma pritet të ketë përkrahje më të madhe në finalen e parë evropiane që luhet në Shqipëri. Por suksesin në ndeshjen historike për Shqipërinë e kërkon edhe Feyenoordi që mezi eliminoi Dritën e Gjilanit gati një vit më parë.