Ndeshje interesante për Dritën në Ligën e Konferencës

Drita e Gjilanit do t’i ketë gjashtë ndeshje interesante në Ligën e Konferencës. Shorti për fazën e ligës në garën e tretë evropiane për nga niveli u tërhoq të premten në Monako. Kampionia e Kosovës ishte në vazon e katërt, ndërsa tri ndeshje do t’i luajë në shtëpi e tri të tjera në udhëtim.

AZ Alkmaari holandez është kundërshtari i Dritës nga vazoja e parë. Me këtë skuadër gjilanasit do të përballen në “Fadil Vokrri”. Prej vazos së dytë kundërshtar i Dritës është ekipi spanjoll, Rayo Vallecano.

Drita do të udhëtojë në Spanjë për përballje me Rayon. Ndërkohë, e pret edhe Omonoian e Qipros dhe Shkëndijën e Tetovës. Pra, do të ketë përballje shqiptare në Ligën e Konferencës.

Drita e Shkëndija janë skuadrat e vetme shqiptare në garat evropiane në këtë edicion. 

Skuadra e Zekirija Ramadanit në udhëtim do të luajë edhe me KuPS-in e Finlandës dhe Shelbournen e Irlandës. 

Secila pikë, e potencialisht secila fitore, do të jetë sukses për skuadrën gjilanase. Vetë kualifikimi në fazën e ligës është vlerësuar sukses historik për Dritën.

“Përpara nesh janë sfida të mëdha, por edhe mundësi të arta për të shkruar faqe të reja në historinë e futbollit tonë. Me zemër, me besim dhe me ‘Intelektualët’ gjithmonë pranë, ne do të luftojmë për ngjyrat tona dhe për ta përfaqësuar Kosovën në arenën evropiane”, ka shkruar Drita.

Në Ligën e Konferencës do të garojnë 36 skuadra. Tetë të parat kalojnë direkt në një të tetën e finales. Skuadrat prej vendit të nëntë deri në vendin e 24-t kalojnë në plejofin e fazës nokaut. Skuadrat prej vendit të 25-të e deri në vendin e 36-të eliminohen. Në fazën e ligës janë gjashtë xhiro.

Xhiroja e parë është më 2 tetor. Më pas, ndeshje të Dritës dhe skuadrave të tjera do të ketë më 23 tetor, 6 nëntor, 27 nëntor, 11 dhjetor dhe 18 dhjetor.

Orari i saktë i ndeshjeve do të përcaktohet deri të dielën. 

Drita është skuadra e dytë kosovare e kualifikuar në gara evropiane, përkatësisht fazë grupore që prej vjet është zëvendësuar me fazë të ligës.

Ballkani i Suharekës është paraqitur dy herë rresht në fazën grupore të Ligës së Konferencës.

Drita e nisi garimin në raundin e parë kualifikues të Championsit. E eliminoi kampionin e Luksemburgut, Differdange. Më pas luajti me Copenhagenin danez, ndërsa u ndal në raundin e dytë kualifikues. U zhvendos në raundin e tretë kualifikues të Ligës së Evropës, ku u eliminua nga kampioni rumun, FCSB. U zhvendos në raundin e plejofit të Ligës së Konferencës. E mposhti sërish në dy ndeshje Differdangen dhe bëri vend në ligë.

Drita ka mundësi që të paktën deri në dhjetor të ketë ndeshje të kupave evropiane në Kosovës, përkatësisht në “Fadil Vokrri”.

Pos me Dritën, Shkëndija përballet edhe me ekipin e papërshtatshëm polak

Shkëndija e Tetovës do të përballet me Dritën në fazën e ligës në “Conference League”. Këtë e përcaktoi shorti i tërhequr të premten në Monako. Ndeshja do të luhet në “Fadil Vokrri”, ndërsa orari i saktë do të përcaktohet deri të dielën.

Shkëndija do të luajë edhe me skuadrën polake, Jagiellonia Bialystok. Me këtë ndeshje do të përballet në Shkup. Jagiellonia përkrahet nga huliganë me qëndrime të thella antishqiptare e antiKosovë. Kështu që ndeshja në Shkup me këtë skuadër pritet me shumë interesim. Në plejof, Jagiellonia e eliminoi Dinamo Cityn e Tiranës, ndërsa provokimet e huliganëve polakë nuk kanë munguar. Ata e kanë fyer Kosovën edhe gjatë ndeshjeve me Novi Pazarin.

Slovan Bratislava e Sllovakisë është kundërshtarja e Shkëndijës nga vazoja e parë. Me Slovanin, Shkëdija luan në Shkup, përkatësisht në shtëpi. Por, me Slovanin dhe Jagiellonian, kuqezinjtë në shtëpi luajnë edhe me Shelbournen e Irlandës. Në udhëtim përballen me Rayo Vallecanon, Dritën dhe AEK Larnacan e Qipros.