Ecja në natyrë dhe të mirat në shëndet

Fikret Shatri çdo ditë gjen kohë për të dalë në natyrë, pavarësisht angazhimeve.

Parkun Gërmia dhe bjeshkët e Istogut, sportisti i frekuenton më së shpeshti. 

Shatri është i njohur si basketbollist i dalluar, por gjurmë ka lënë edhe para 5 vjetësh duke vrapuar për 48 orë nga sheshi “Skënderbe” në Prishtinë deri te sheshi “Skënderbe” në Tiranë.

“Ecja në natyrë është diçka e pazëvendësueshme. Sepse ecja në natyrë dhe vrapi gjithashtu janë një terapi që e ulin stresin, sjellin hare dhe pozitivitet. Nuk është ditë e njëjtë kur unë një ditë jam në natyrë dhe një ditë nuk jam në Gërmi apo diku në natyrë. Përveç Gërmisë, i frekuentoj edhe bjeshkët e Istogut, sidomos gjatë vikendeve. Janë bjeshkë të bukura. Shtigjet që i ka Gërmia janë shtigje të bukura që të gjitha shtresat e njerëzve mund t’i kalojnë. Gërmia është përrallore, shtigjet më të bukura i ka nga të gjitha. Ju këshilloj të gjithëve të dilni në Gërmi për ecje dhe vrapim. Kohëve të fundit çdo ditë po bëj fitnes, sepse me fitnes po i aktivizoj të gjitha pjesët e trupit, por i kombinoj edhe me ecje dhe vrap në natyrë. Kur kombinohen këto, çdo kush mund ta forcojë trupin dhe të ketë shëndet më të mirë”, thotë Shatri.

“Në kohën e pandemisë ka qenë një demoralizim në popullatë. Gjithçka ishte në mbyllje. Pasi e bëra vrapin nga Prishtina në Istog, vendosa që më 2 korrik të nisesha nga sheshi ‘Skënderbe’ në Prishtinë drejt sheshit ‘Skënderbe’ në Shqipëri. Ka qenë temperaturë 43 gradë dhe kam hasur vështirësi të shumta, por e kam tejkaluar. Ka qenë diçka e jashtëzakonshme. Krejt këtë e kam përballuar me ndihmën e miqve nga grupet sportive”, shton ai.

Shatri e ka nisur karrierën si sportist profesionist në basketboll, por edhe më pas ka mbetur aktiv.

“Në vitin 2020 e kam ndërprerë karrierën si lojtar profesionist. Gjatë viteve është një numër i madh i ndeshjeve që kam luajtur, ndër to edhe kemi fituar. Tash jam kampion në ligën e veteranëve të basketbollit që janë mbajtur para 3 vjetësh. Edhe kësaj dite jam aktiv dhe do të vazhdoj me sportin”, deklaron Shatri.

Ndërsa Rushit Ismajli, mjek i përgjithshëm në Qendrën Kryesore të Mjekësisë Familjare, tregon se ecja dhe vrapi sjellin shëndet të mirë.

“Ecja është shumë e dobishme për shëndetin tonë, pasi me këtë e vëmë në funksion qarkullimin e gjakut dhe funksionin e zemrës. Me ecje edhe e qetësojmë trurin. Ecja me hapa të shpejtë rrit të rrahurat e zemrës dhe e përshpejton qarkullimin e gjakut. Ecja në natyrë është shumë mirë, por edhe vrapi është i domosdoshëm dhe shumë më i mirë për shëndetin tonë”, deklaron ai.

Ecja në natyrë nuk kërkon shumë, preferohet që të paktën 30 minuta në ditë t’i ndajmë për ecje apo vrap në natyrë. 

E 15 tetori njihet si dita e ecjes në natyrë.