Tri zakone të shëndetshme në moshën e mesme mund ta vonojnë demencën deri në 13 vjet

Një studim i ri ka zbuluar se kujdesi për shëndetin në moshën 45-65 vjeç mund ta vonojë shfaqjen e demencës mesatarisht me afro 13 vjet, ka shkruar The Guardian.

Sipas hulumtimit, tre faktorët më të rëndësishëm janë mbajtja e tensionit të gjakut në vlera normale, shmangia e diabetit të tipit 2 si dhe mospirja e duhanit.

Shkencëtarët nga NYU Langone Health analizuan të dhënat e mbi 12 mijë personave, të cilët u ndoqën për rreth 26 vjet. Gjatë kësaj periudhe, mbi 3 mijë pjesëmarrës zhvilluan demencë.

Rezultatet treguan se personat që nuk kishin asnjërin nga këta tre faktorë rreziku jetuan mesatarisht 30 vjet pa demencë, ndërsa ata që i kishin të tre jetuan vetëm rreth 17 vjet pa e zhvilluar sëmundjen.

“Gjetjet tona tregojnë se njerëzit duhet t’i shmangin këta faktorë rreziku gjatë moshës së mesme, nëse duan ta ruajnë shëndetin e trurit për më shumë se një dekadë”, ka thënë drejtuesi i studimit, doktori Josef Coresh.

Ai ka shtuar se shpreson që rezultatet “t’i nxisin njerëzit të lënë duhanin dhe të kujdesen për shëndetin e enëve të gjakut duke filluar nga mosha 45 vjeç”, ka thënë ai.

Edhe Lifestyle 28 kor 2026 Tri gjëra që duhet t’u kushtoni vëmendje ndërsa plakeni

Edhe doktoresha Jacqui Hanley nga Alzheimer’s Research UK, e cila nuk mori pjesë në studim, ka theksuar rëndësinë e këtyre gjetjeve.

“Edhe pse nuk ka një mënyrë të garantuar për ta parandaluar demencën, gjithnjë e më shumë studime tregojnë se kujdesi për shëndetin e zemrës dhe enëve të gjakut mund të ulë rrezikun e rënies së aftësive njohëse dhe të demencës”, ka thënë ajo.

Sipas ekspertëve aktiviteti i rregullt fizik, mos pirja e duhanit dhe mbajtja nën kontroll e tensionit të gjakut dhe diabetit, janë masa që mund të ndihmojnë jo vetëm zemrën, por edhe trurin.