-
Përktheu:
Vita Abrashi-Kajtazi
- 4 gusht 2025 23:45
- Shpërndaje në:
Nëse nuk mund ta nisni ditën pa një filxhan kafe, nuk jeni vetëm. Por nëse gjithashtu merrni suplemente çdo mëngjes, është e rëndësishme të dini se kafeja mund të ndikojë në mënyrën se si trupi i përthith ato.
Kafeina, polifenolët dhe efekti i tyre diuretik mund të ndikojnë në përthithjen e disa vitaminave dhe mineraleve, ka shkruar Eating Well.
“Për shembull, përthithja e hekurit mund të ngadalësohet nga kafeina”, ka shpjeguar farmacisti Philip Ngo.
Më poshtë janë 5 suplemente që, sipas farmacistëve, nuk kombinohen mirë me kafen. Gjithashtu shpjegohet se si mund ta menaxhoni kohën për t’i marrë sa më me efekt.
1. Hekuri
Hekuri është thelbësor për qarkullimin e oksigjenit në trup. Megjithatë, kafeja mund të ndikojë ndjeshëm në përthithjen e tij.
“Pirja e kafes me një suplement hekuri mund të ulë përthithjen me 54 për qind”, ka thënë farmacisti Bo Wang.
Kjo nuk ka të bëjë me kafeinën, por me acidin klorogjenik, një polifenol që gjendet te kafeja dhe çaji.
Ky përbërës pengon përthithjen e hekurit jo-hemik (që gjendet në bimë dhe suplemente).
Këshillohet që suplementin me hekur ta merrni të paktën një orë para ose pas kafesë dhe ta shoqëroni me ushqime të pasura me vitaminë C, si limoni ose portokalli, që ndihmojnë përthithjen.
2. Vitamina D
Vitamina D është thelbësore për shëndetin e kockave dhe imunitetin, por nuk përthithet mirë në praninë e kafeinës.
“Kafeina mund të ulë ndjeshmërinë e receptorëve të vitaminës D, duke reduktuar nivelet e saj në gjak”, shpjegon farmacistja Elise Kim, Pharm.D.
Një studim i vitit 2021 gjeti lidhje midis konsumit të lartë të kafeinës dhe niveleve më të ulëta të vitaminës D.
Këshillë: Merreni vitaminën D të paktën një para ose pas kafesë dhe gjithmonë me ushqim që përmban yndyra të shëndetshme, që ndihmojnë përthithjen (si avokado apo arrat).
3. Vitaminat B
Vitaminat B (si B1, B2, B6, B12) janë të tretshme në ujë dhe ndihmojnë në energji dhe funksionimin nervor. Por trupi nuk i ruan për periudha të gjata dhe i nxjerr shpejt.
“Kafeina, për shkak të efektit diuretik, mund të rrisë humbjen e vitaminave B përmes urinës”, ka thënë Kim.
Kurse Wang ka shtuar se vitaminën B nuk duhet marrë me kafe ose çaj.
“Prisni të paktën një orë. Mund të merren edhe pa ushqim, por është më mirë pas një vakti”, ka thënë Wang.
4. Magnezi
Ky mineral ndihmon në gjumë, tensionin e gjakut dhe relaksimin muskulor. Por kafeina e rrit nxjerrjen e tij nga trupi përmes urinës.
Nëse merrni magnez në mbrëmje për të përmirësuar gjumin, shmangni kafen ose pijet me kafeinë pasdite vonë, sepse jo vetëm pengon gjumin, por edhe ul efektin e magnezit.
5. Kalciumi
Kalciumi ndihmon në forcimin e eshtrave, por përthithja e tij ndikohet nga kafeja.
“Kafeina mund të reduktojë përthithjen e kalciumit dhe të rrisë nxjerrjen e tij në urinë me 77 për qind”, ka thënë Kim, duke iu referuar një studimi.
Këshillohet që të shtoni pak qumësht në kafe për të kompensuar humbjen e kalciumit dhe merrni suplementin një orë pas kafes ose dy orë përpara.
Këshilla përfundimtare nga ekspertët
Kafeja mund të ndikojë në mënyrën se si trupi përthith disa vitamina dhe minerale, por me pak kujdes në kohëzgjatje, mund t'i përfitoni të dyja.
“Nëse i merrni herë pas here bashkë, mos u shqetësoni shumë, një pjesë e lëndëve ushqyese do përthithet gjithsesi”, ka siguruar Ngo.
Por ai ka thënë gjithashtu se duhet bërë kujdes sepse suplementet duhet të merren vetëm kur janë të nevojshme.
“Suplemente duhen marrë vetëm kur ka nevojë. Për një person me dietë të balancuar dhe shëndet të mirë, ato shpesh nuk janë të nevojshme”, ka përfunduar ai.