Për të rriturit që i kanë mbijetuar një sulmi në zemër ose në tru, marrja e aspirinës rregullisht mund ta zvogëlojë rrezikun e një sulmi të dytë, raporton “CNN”.
Por një studim i ri sugjeron se më pak se gjysma e këtyre pacientëve me sëmundje kardiovaskulare anembanë botës po përdorin aspirinë për ta parandaluar një sulm të dytë.
Sëmundjet kardiovaskulare janë shkaku kryesor i vdekjeve në mbarë botën, duke marrë rreth 18 milionë jetë çdo vit, sipas Organizatës Botërore të Shëndetësisë.
Është vlerësuar se më shumë se 4 në 5 vdekje nga sëmundjet kardiovaskulare janë për shkak të sulmeve në zemër dhe atyre në tru. Për shkak se Aspirina ndihmon në hollimin e gjakut, kjo mund të ndihmojë në uljen e rrezikut të bllokimeve në arteriet që mund të shkaktojnë një atak në zemër ose sulm në tru.
Në mesin e njerëzve me një histori të sëmundjeve kardiovaskulare që u anketuan në studimin e ri, vetëm rreth 40% raportuan marrjen e aspirinës për ta parandaluar një tjetër atak në zemër, tru apo ngjarje tjetër kardiovaskulare.
Proporcioni i pacientëve që përdorin aspirinë për të reduktuar rrezikun e një sulmi të dytë ndryshonte sipas vendit. Megjithatë, duke filluar nga 16.6% në vendet me të ardhura të ulëta si Afganistani, Benini dhe Etiopia në 65% në vendet me të ardhura të larta si Çekia, Mbretëria e Bashkuar dhe SHBA, sipas studimit, botuar të martën në revistën mjekësore JAMA.
"Ne kishim shpresuar se normat e përdorimit të aspirinës për parandalimin e një sulmi të dytë në zemër do të ishin shumë më të larta", ka thënë Dr. Sang Gune Yoo, një autor i studimit dhe një studiues i sëmundjeve kardiovaskulare në divizionin kardiovaskular në Washington University School of Medicine në St. Louis.
Edhe
Studimet tregojnë se aspirina mund të ulë rrezikun nga disa lloje kanceri
Parandalimi sekondar i referohet përdorimit të aspirinës për të zvogëluar rrezikun e një ataku të dytë në zemër ose në tru. Ndryshe nga parandalimi primar, ku raporti risk-përfitim i aspirinës nuk është aq i qartë, kërkimet në dispozicion mbi parandalimin sekondar tregojnë se përfitimet e marrjes së aspirinës i tejkalojnë shumë rreziqe për njerëzit që kanë pasur një sulm në zemër ose në tru.
Organizata Botërore e Shëndetësisë ka një objektiv që të paktën 50% e atyre njerëzve të mundshëm të marrin një lloj terapie dhe këshillimi për të parandaluar sulmet në zemër dhe në tru.
Përgatiti: Vita Abrashi-Kajtazi
