Ish-futbollisti i Arsenalit, Thomas Partey, është akuzuar për dhunim dhe për sulm seksual, është bërë e ditur të premten.
Partey përballet me pesë akuza për përdhunim dhe një akuzë për sulm seksual.
32-vjeçari nga Gana ishte pjesë e Arsenalit deri të martën, kur edhe i përfundoi kontrata. Ai luan në mesfushë, ndërsa aktualisht është pa ekip. Partey karrierë ka bërë edhe tek Atletico Madridi, Mallorca e Almeria. Te dy të fundit ishte i huazuar.
Në skuadrën londineze, Partey ishte për pesë vjet.
Policia metropolitane e Londrës ka njoftuar se veprat penale dyshohet se kanë ndodhur në vitet 2021 e 2022.
Akuzat kanë të bëjnë me tri gra të ndryshme, shkruan BBC. Dy akuza janë për dhunimin e një gruaje dhe tri akuza për dhunim të një gruaje tjetër. Ndërkohë një akuzë ka të bëjë me sulm seksual ndaj një gruaje të tretë.
Edhe
Partey deklarohet i pafajshëm për akuzat për dhunim dhe sulm seksual
Partey ka luajtur 167 ndeshje me Arsenalin, në të cilat ka shënuar nëntë gola dhe ka bërë shtatë asistime. Tek Atletico Madridi i luajti 188 ndeshje, derisa realizoi 16 gola e 12 asistime. Është njëri prej kapitenëve të Ganës.
Ai do të paraqitet në një gjykatë në Londër më 5 gusht. Partey ishte arrestuar për herë të parë në korrik të vitit 2022, ndonëse emri nuk i ishte bërë i ditur. Ai vazhdoi të luante për Arsenalin, ndërsa hetimet vazhdonin. Arsenali e kishte transferuar në vitin 2020 për 45 milionë euro.
