FC Mitrovica mund të mburret që ka një reprezentues të rëndësishëm

Dion Gallapeni i Prishtinës ishte i ftuar te Kosova për dy ndeshjet me Islandën. Pas lëndimit të Aro Muriqit, u ftua edhe portieri i Dritës, Faton Maloku. 

Klubet e tjera të Superligës nuk përfaqësohen me lojtarë në përfaqësuesen e Kosovës e me shumë gjasë shumica as në përfaqësuese të tjera. 

Por një klub i Ligës së Parë të Kosovës në futboll e ka në radhët e veta një reprezentues. Madje të rëndësishëm.

Bëhet fjalë për Yonis Abdirizak Farah, që luan për klubin Mitrovica e po ashtu për përfaqësuesen e Somalisë. Mbrojtësi 25-vjeçar i krahut të majtë startoi te Somalia në fundjavë në ndeshjen kualifikuese për Kupën e Botës 2026. 

Në Bregun e Fildishtë, Somalia barazoi pa gola me Guinenë. Farah luajti deri në minutën e 65-të në krahun e majtë, ndërsa u shqua edhe për disa ndërhyrje vendimtare.

Edhe Futboll 9 gus 2026 Aurora Muliqi, 18-vjeçarja që po shkruan histori me Mitrovicën

Somalia është përfaqësuese inferiore në futbollin afrikan. Pika ndaj Guinesë ishte e para në kualifikimet për Botëror. Megjithatë, për një futbollist të kategorisë së dytë të Kosovës është sukses që paraqitet për një përfaqësuese.

“Jam i lumtur që kam dhënë kontribut për të ndihmuar vendin tim. Por nuk isha vetëm unë, ishte angazhimi i gjithë ekipit që solli barazimin”, ka thënë Farah për KOHËN, të hënën. 

Ai është transferuar te Mitrovica në fillim të muajit shkurt. Kjo skuadër është e fundit në Grupin A të Ligës së Parë. Në 19 ndeshje ka mbledhur tetë pikë.

Mitrovica ka edhe të huaj të tjerë, por Farah është më i njohuri.

“Kalimi te Mitrovica është hap i mirë për karrierën time. Është platformë e mirë për mua për të arritur më lart. Dua të falënderoj presidentin e klubit dhe stafin për mundësinë e dhënë dhe po ashtu menaxherin tim, Elvis Bicaj”, ka shtuar 25-vjeçari Farah.

Ai është i lindur në Londër. Ka luajtur për skuadra të ndryshme në Angli, por jo të nivelit të lartë. Ka bërë karrierë edhe në Norvegji e Suedi, ndërsa karriera e solli te Mitrovica.

Aktualisht është në Botsuanë, ku Somalia të martën e luan ndeshjen e ardhshme kualifikuese për Botëror. Somalia është në grup me Algjerinë, Mozambikun, Guinenë, Botsuanën dhe Ugandën. Ka një pikë nga pesë ndeshje.

“Përfaqësuesja, natyrisht, është e nivelit të lartë. Ka lojtarë që luajnë në nivelet më të larta në vende si Kanadaja, Malta, Norvegjia, Finlanda, Mali i Zi dhe vende të tjera. Për mua është nder të prezantoj vendin tim. Prindërit e mi janë nga Somalia dhe ëndërr e çdo djaloshi është të përfaqësojë vendin e tij një ditë. Kështu që jam shumë i lumtur që mund ta bëj këtë”, ka thënë Yonis Farah.

Edhe Futboll 26 kor 2026 Mitrovica synon të tjera fitore në Champions, tani në Budapest

Ai ka debutuar për Somalinë në vitin 2019, në fitoren 1:0 ndaj Zimbabvesë. Ishte fitorja e parë e Somalisë në kualifikimet për Botëror. Tashmë i ka shtatë ndeshje.

Ka shkrime që futbollisti i Mitrovicës është kushëri i atletit të njohur britanik, Mo Farah. Ai është me prejardhje nga Somalia, ndërsa vlerësohet prej atletëve më të mirë të dekadave të fundit.