Të paktën 16 të vdekur nga zjarri në një qendër tregtare në Kinë

Të paktën 16 persona kanë mbetur të vdekur të mërkurën në provincën Sichuan të Kinë, si pasojë e një zjarri në një qendër tregtare.

Zjarrfikësit dhe ekipet e shpëtimit në qytetin jugperëndimor kinez të Zigong iu përgjigjën një thirrjeje për zjarr në ndërtesën tregtare 14-katëshe, dhe arritën të largonin 75 njerëz nga aty, sipas agjencisë zyrtare të lajmeve Xinhua, raporton AP.

Videot e postuara në mediat sociale tregonin tymin e zi që dilte nga ndërtesa e madhe, derisa shumë njerëz të bllokuar brenda ndërtesës, po prisnin për të shpëtuar.

Përpjekjet e shpëtimit përfunduan në orën 3:00 të mëngjesit të së enjtes dhe një hetim paraprak tregon se zjarri u shkaktua nga punimet në ndërtim.

Nuk dihet menjëherë se sa njerëz ishin në ndërtesë kur shpërtheu zjarri.

Ndërtesa strehon një dyqan, zyra, restorante dhe një kinema.