-
Përktheu:
Flutura Gashi-Mehmeti
- 11 maj 2026 12:21
- Shpërndaje në:
Kryeministri britanik, Keir Starmer, është zotuar të hënën se do t’u dëshmojë “dyshuesve” brenda partisë së tij dhe votuesve në përgjithësi se e kanë gabim, teksa përpiqet të luftojë kërkesat për dorëheqje, pas rezultateve shkatërruese të zgjedhjeve lokale për Partinë Laburiste.
Starmer ka argumentuar se ai do të “përballet me sfidat e mëdha” dhe do të rikthejë “shpresën” në vend. Kjo përfshin afrimin me Bashkimin Evropian dhe “vendosjen e Britanisë në zemër të Evropës”, një dekadë pasi Mbretëria e Bashkuar votoi për t’u larguar nga BE-ja.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“E di që kam dyshuesit e mi dhe e di që duhet t’u dëshmoj se gabojnë, dhe do ta bëj”, ka thënë Starmer gjatë një fjalimi në Londër. Ai ka premtuar t’u tregojë miliona njerëzve “të lodhur nga një status quo që i ka zhgënjyer” se qeveria është në anën e tyre.
Ai ka thënë më tej se Partia Laburiste është në “një betejë për shpirtin e kombit” dhe se Mbretëria e Bashkuar do të ndjekë “një rrugë të errët” nëse “Reformo Britaninë”, partia kundër emigracionit e drejtuar nga Nigel Farage, vjen në pushtet.
Megjithatë, pozita e Starmerit mbetet e brishtë, pasi dhjetëra deputetë kërkojnë që ai të shpallë një datë për largimin e tij.
Ish-zëvendëskryeministrja, Angela Rayner, një figurë e fuqishme që shpesh shihet si sfiduese e mundshme, ka thënë se “ajo që po bëjmë nuk po funksionon dhe duhet të ndryshojë”.
Rayner nuk ka kërkuar drejtpërdrejt dorëheqjen e Starmerit, por e ka akuzuar atë për drejtimin e “një kulture toksike të favorizimeve politike” dhe ka thënë se qeveria duhet “t’u qëndrojë besnike vlerave të punës dhe social-demokracisë” dhe të ulë koston e jetesës për njerëzit që punojnë.
Partia Laburiste është zhytur në pesimizëm pas humbjeve të mëdha javën e kaluar në zgjedhjet lokale në të gjithë Anglinë dhe në votimet legjislative në Skoci dhe Uells. Zgjedhjet janë interpretuar si një referendum jozyrtar për Starmerin, popullariteti i të cilit ka rënë ndjeshëm që kur erdhi në pushtet me një fitore të thellë më pak se dy vjet më parë.
Qeveria e tij ka hasur vështirësi në realizimin e rritjes ekonomike të premtuar, në përmirësimin e shërbimeve publike të dëmtuara dhe në uljen e kostos së jetesës. Gjithashtu është dëmtuar nga gabime të përsëritura dhe ndryshime politike në çështje si reforma sociale. Starmer është kritikuar edhe për emërimin e Peter Mandelsonit, mik i diskredituar i Jeffrey Epstein, si ambasador i Britanisë në Uashington.
Një politikë kyçe është afrimi me Bashkimin Evropian, nga i cili Mbretëria e Bashkuar u largua në vitin 2020, katër vite pasi pala “leave” fitoi ngushtë referendumin për anëtarësimin. Qeveria e Starmer tashmë ka ndërmarrë hapa për të lehtësuar disa nga kufizimet tregtare që kanë rënduar bizneset britanike pas Brexit-it, dhe ai thotë se do të sigurojë një marrëveshje për lëvizjen e të rinjve, në mënyrë që ata të mund të kalojnë disa vite duke punuar nëpër Evropë.