-
Përktheu:
Flutura Gashi-Mehmeti
- 22 qershor 2026 10:37
- Shpërndaje në:
Keir Starmer, ka dhënë të hënën dorëheqjen nga pozita e kryeministrit të Britanisë së Madhe e po ashtu nga ajo e liderit të Partisë Laburiste, duke i hapur rrugën Britanisë që të ketë kryeministrin e saj të shtatë në vetëm 10 vjet.
Më pak se dy vjet pasi arriti një fitore dërrmuese në zgjedhje, e cila premtonte t’i jepte fund kaosit në politikën britanike, Starmer ka deklaruar të hënën se ishte bërë më se e qartë se partia e tij dëshironte largimin e tij.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoAi ka thënë se çdo vendim që ka marrë në detyrë ka qenë për “ta vënë në radhë të parë vendin e tij që e do shumë”
Ai ka njoftuar po ashtu se nominimet për kandidatët që do ta zëvendësojnë do të hapen më 9 korrik. Megjithatë, rivali i tij, Andy Burnham, konsiderohet favorit i qartë.
Presioni ndaj Starmerit, i cili kishte ardhur duke u rritur prej muajsh, u shtua ndjeshëm të premten kur Burnham, kryetari i qarkut Greater Manchester, fitoi bindshëm një zgjedhje parlamentare për t’u rikthyer në Westminster, duke mposhtur kandidatin e partisë së Nigel Farage, “Reformo Mbretërinë e Bashkuar ”, e cila ka kryesuar sondazhet kombëtare për më shumë se një vit.
Kjo fitore u dha shpresë deputetëve laburistë se Burnham, një politikan me përvojë i njohur për aftësitë e tij komunikuese, mund të ndryshojë fatin e partisë, e cila ka humbur mbështetje nën drejtimin e Starmerit, popullariteti i të cilit ka rënë në nivelet më të ulëta për çdo lider britanik.
Andy Burnham, i cili mund të zëvendësojë kryeministrin, do të jetë të hënën në Westminster për t'u betuar si deputet për Makerfield, pasi ka fituar zgjedhjet e pjesshme javën e kaluar.
Kryeministri Starmer dhe aleatët e tij kishin këmbëngulur për javë të tëra se do të luftonin çdo sfidë për udhëheqjen nga Burnhami ose nga kushdo tjetër, përpara zgjedhjeve të pjesshme në Makerfield, në të cilat Burnham siguroi rikthimin e tij në Parlament.
Megjithatë, të dielën në mëngjes, sekretari për biznesin, Peter Kyle, i ka thënë Sky News se Starmer po e kalon fundjavën duke “reflektuar mbi realitetet politike” me të cilat po përballet.
Pasi kryetari Greater Manchester, Andy Burnham fitoi zgjedhjet e së enjtes me një diferencë të konsiderueshme ndaj partisë "Reform UK" të Nigel Farage, duke siguruar mbi 9,000 vota avantazh dhe më shumë se 50% të votave, ekipi i Burnhamit besonte se ka mbështetjen e rreth 200 deputetëve laburistë, afërsisht gjysmës së grupit parlamentar.
Që atëherë, ky numër është rritur dhe Burnham është bërë gjithnjë e më i bindur se mund të marrë drejtimin e Partisë Laburiste dhe, rrjedhimisht, postin e kryeministrit pa një garë formale.
Të premten, ministra që më parë kishin qenë besnikë ndaj Starmerit i kanë thënë atij se duhej të merrte një vendim për afatin e largimit të tij deri në fund të fundjavës, përndryshe rrezikonte të detyrohej të largohej nga posti.
Çdo deputet që dëshiron të sfidojë për postin e liderit duhet të sigurojë mbështetjen e të paktën 20% të grupit parlamentar, ose 81 deputetëve.
Largimi i Starmerit e çon Mbretërinë e Bashkuar drejt kryeministrit të saj të shtatë brenda 10 vjetëve, vetëm dy vjet pasi ai udhëhoqi Laburistët drejt një fitoreje të thellë në zgjedhjet e përgjithshme, duke fituar një shumicë prej 174 vendesh.
Megjithatë, qeverisja e tij është goditur nga polemika dhe ndryshime të njëpasnjëshme qëndrimesh, përfshirë çështjen e pagesave për ngrohjen dimërore për të moshuarit dhe vendimin për të emëruar Peter Mandelson si ambasador të Mbretërisë së Bashkuar në Uashington.
Partia Laburiste ka rënë ndjeshëm në sondazhe dhe vetë Starmer është shumë jopopullor tek një pjesë e madhe e publikut.
Kush është Andy Burnham, ligjvënësi që po kërkon ta zëvendësojë Starmerin?
Photo: Associated Press
Andy Burnham është një politikan që është shndërruar në një figurë që synon të bëhet kryeministri i ardhshëm i Britanisë.
Politikani 56-vjeçar paraqitet si një njeri i thjeshtë nga veriu i Anglisë, që preferon bluzat e thjeshta në vend të kostumit dhe kravatës, dhe që kohën e lirë e kalon duke luajtur futboll ose duke lëshuar muzikë të viteve 1990.
Ai është gjithashtu një politikan me përvojë, karriera e të cilit e ka çuar nga poste të larta qeveritare deri te posti i kryetarit Greater Manchester, dhe tani në prag të zyrës së kryeministrit.
Burnham pritet të sfidojë kryeministrin Keir Starmer pasi fitoi një vend në Parlament në një palë zgjedhje të veçanta, të cilat i përshëndeti si një “pikë kthese” për politikën britanike.
Ai është lindur dhe rritur në një zonë të Anglisë veriperëndimore, mes Liverpoolit dhe Mançesterit, si djali i një inxhinieri të “British Telecom” dhe një recepsionisteje.
Burnham i është bashkuar Partisë Laburiste si adoleshent, ka studiuar në Universitetin e Cambridge dhe është zgjedhur për herë të parë deputet në vitin 2001.
Ai ka shërbyer si deputet për rreth 15 vjet, duke u ngjitur në hierarkinë politike gjatë qeverisë së Tony Blair dhe duke qenë pjesë e kabinetit të kryeministrit, Gordon Brown, nga viti 2007 deri në vitin 2010.
Ai ka kandiduar dy herë për drejtimin e Partisë Laburiste, në vitet 2010 dhe 2015, por ka humbur bindshëm në të dy rastet. Më pas është larguar nga Westminster për të kandiduar për kryetar të Mançesterit.
Mandati i tij i ka sjellë nofkën “Mbreti i Veriut”, një referencë e frymëzuar nga seriali “Game of Thrones”, që lidhet si me mbrojtjen e interesave të rajonit të tij, ashtu edhe me ambiciet e tij politike që nuk i fsheh plotësisht.
Ai e ka fituar këtë nofkë gjatë pandemisë COVID-19, kur kritikoi ashpër kryeministrin konservator, Boris Johnson, për atë që ai e quajti një qasje “të përqendruar te Londrës” ndaj krizës.
Burnham ka udhëhequr rajonin e Greater Manchester që nga viti 2017, duke mbikëqyrur rigjallërimin e shpejtë të qytetit ku lindi Revolucioni Industrial.
Qendra e qytetit është zhvilluar ndjeshëm, me rrokaqiej të rinj që janë ngritur në zona të mëparshme industriale. Shumë banorë e vlerësojnë atë për mbështetjen e qytetit. Ai e mori nën kontroll publik një sistem transporti publik të fragmentuar, e quajti Bee Network dhe përmirësoi shërbimet e tij.
Ai ka fituar gjithashtu vlerësime për mbështetjen e fushatës për drejtësi për viktimat e tragjedisë Hillsborough, ku 97 tifozë të Liverpoolit humbën jetën nga një stampedo, gjatë një ndeshjeje futbolli në vitin 1989.
Vite të tëra përpjekjesh nga familjet e viktimave zbuluan gabime dhe shkelje nga policia, e cila fillimisht kishte përhapur pretendime të rreme duke fajësuar tifozët e dehur, dhe çuan në një kërkimfalje nga qeveria.
Burnham konsiderohet politikisht se qëndron më majtas se Starmeri, gjë që shihet si avantazh mes anëtarëve të Partisë Laburiste, dhe ai njihet si një nga komunikuesit më të mirë të partisë.
Tri fitoret e tij në zgjedhjet për kryetar bashkie dhe fitorja bindëse në zgjedhjet e së enjtes në Makerfield, ku mposhti me diferencë kandidatin e partisë kundër emigracionit “Reform UK”, Nigel Farage, e kanë forcuar reputacionin e tij si fitues.
Shumë brenda partisë shpresojnë se ai mund të përmbysë rënien e madhe të popullaritetit të Laburistëve që nga fitorja dërrmuese e Starmerit në zgjedhje dy vjet më parë.
Burnham premton të zbatojë në shkallë kombëtare modelin e tij të njohur të “Manchesterizmit” – një politikë që, sipas tij, vendos njerëzit dhe vendet para partisë dhe përqendrohet te rajonet që janë lënë pas dore nga qeveritë në Londër.
“Ajo që kemi ndërtuar në Greater Manchester duhet të shtrihet në nivel kombëtar”, ka thënë Burnham gjatë fushatës.
Në fjalimin e tij pas zgjedhjeve, Burnham ka paraqitur prioritetet e tij: arsim profesional më të mirë dhe vende pune për të rinjtë, ulje të faturave të energjisë dhe çmimeve të biletave të trenit, si dhe “fundin e ekonomisë së rrjedhjes nga lart-poshtë, e cila në fakt nuk ka sjellë shumë përfitime për vende si ky”.
Kritikët thonë se politikat e Burnhamit janë të paqarta dhe nuk përballen me pyetje të vështira, siç është burimi i financimit për premtimet e tij.
Ata gjithashtu theksojnë se drejtimi i një vendi me 70 milionë banorë është shumë ndryshe nga administrimi i një rajoni urban me 3 milionë banorë.
Megjithatë, Burnham tani ka fituar vrull politik, i cili mund ta çojë deri në Downing Street.