-
Përktheu:
Flutura Gashi-Mehmeti
- 6 nëntor 2025 12:20
- Shpërndaje në:
Ukraina do të përballet me një “luftë të përjetshme” dhe një erozion të ngadaltë të territorit, nëse Evropa nuk rrit ndjeshëm presionin ndaj Rusisë, duke përfshirë vendosjen e trupave dhe krijimin e një mburoje raketash dhe dronësh në territorin e NATO-s për të mbrojtur Ukrainën nga sulmet ruse ndaj infrastrukturës së saj, ka thënë ish-sekretar i Përgjithshëm i NATO-s, Anders Fogh Rasmussen.
Rasmussen, i cili ka mbajtur postin e NATO-s nga viti 2009 deri në vitin 2014 dhe ishte kryeministër i Danimarkës nga viti 2001 deri në vitin 2009, ka thënë në një intervistë për The Guardian se nëse vende të tilla si Polonia do të pranonin të strehonin mbrojtje të tilla ajrore, Rusia do të kuptonte se një sulm ndaj Ukrainës do të ishte një sulm ndaj të gjithë aleancës së NATO-s.
“Ne duhet t'i ndihmojmë (popullit) ukrainas të mbrohet nga raketat dhe dronët rusë duke ndërtuar një mburojë ajrore që i ndihmon ukrainasit të rrëzojnë raketat dhe dronët rusë. Vendet fqinje të NATO-s me Ukrainën mund të jenë vendi për një sistem mbrojtjeje ajrore dhe raketash me bazë në NATO”, ka deklaruar ai.
Rasmussen gjithashtu ka bërë thirrje për vendosjen e një force mbrojtëse evropiane për Ukrainën përpara një marrëveshjeje armëpushimi.
Ai ka shtuar se “koalicioni i të vullnetshëmve” që shpresonte të mblidhte një forcë të tillë kur të mbaronte luftimi, ishte reduktuar në një koalicion të atyre që prisnin.
“Nëse nuk kryejmë ndryshime të mëdha në strategji, do të shohim një luftë të përjetshme. Putini nuk ka asnjë nxitje për t’u angazhuar në negociata paqeje për sa kohë që mendon se mund të fitojë në fushën e betejës. Nevojiten ndryshime në shpejtësi dhe mentalitet”, është shprehur ai.
Rasmussen, i cili ka krijuar lidhje të ngushta me udhëheqjen ukrainase, po viziton kryeqytetet evropiane, përfshirë Londrën, për t’u takuar me këshilltarin e sigurisë kombëtare të Mbretërisë së Bashkuar, Jonathan Powell.
Të dy burrat diskutuan nëse SHBA-ja mund t’i ofrojë garanci sigurie Ukrainës, duke përdorur një gjuhë të ngjashme me atë të përdorur së fundmi nga SHBA-ja kur i dha garanci sigurie Katarit pasi Izraeli sulmoi kryeqytetin e tij, Doha.