-
Përktheu:
Flutura Gashi-Mehmeti
- 5 tetor 2025 12:09
- Shpërndaje në:
Të paktën pesë civilë kanë mbetur të vdekur pasi Rusia ka lëshuar dronë, raketa dhe bomba ajrore në Ukrainë gjatë natës të së shtunës deri të dielën në mëngjes.
Zyrtarët kanë thënë se sulmi kishte në shënjestër infrastrukturën civile.
Moska ka lëshuar mbi 50 raketa balistike dhe rreth 500 dronë në nëntë rajone në të gjithë Ukrainën, ka thënë presidenti Volodymyr Zelensky të dielën në mëngjes, raporton AP.
Katër persona, përfshirë një 15-vjeçar, kanë vdekur në një sulm të kombinuar me dron dhe raketa në Lviv, sipas zyrtarëve rajonalë dhe shërbimit të emergjencës së Ukrainës. Qyteti historik perëndimor shpesh shihet si një strehë nga luftimet dhe shkatërrimet në lindje. Të paktën gjashtë persona të tjerë kanë pësuar lëndime, sipas një deklarate nga forcat policore të Ukrainës.
Sulmi ka lënë dy lagje pa energji elektrike dhe transportin publik të pezulluar për disa orë të dielën në mëngjes, ka raportuar kryebashkiaku Andriy Sadovyi.
Në qytetin jugor të Zaporizhzhisë, një sulm ajror gjatë natës ka lënë të vdekur një grua dhe ka plagosur nëntë persona të tjerë, përfshirë një vajzë 16-vjeçare, ka raportuar guvernatori rajonal Ivan Fedorov.
Fedorov ka thënë se sulmi ka shkatërruar ndërtesa banimi dhe ka lënë rreth 73,000 familje në Zaporizhzhia dhe zonat përreth pa energji elektrike.