-
Përktheu:
Flutura Gashi-Mehmeti
- 18 gusht 2025 17:47
- Shpërndaje në:
Një nga zyrtarët ukrainas që do të shoqërojnë presidentin ukrainas, Volodymyr Zelensky në Shtëpinë e Bardhë është Rustem Umerov, ish-ministër i Mbrojtjes dhe tani kreu i Këshillit kombëtar të sigurisë dhe mbrojtjes të Ukrainës.
Ai është një tatar etnik i Krimesë - një anëtar i popullsisë indigjene të Krimesë, rajoni ukrainas i aneksuar nga Rusia në vitin 2014.
Ashtu si pothuajse të gjithë tatarët e tjerë të Krimesë, paraardhësit e tij u deportuan në Azinë Qendrore nga Stalini në vitin 1944 dhe vetë Umerov lindi në Uzbekistan.
Familja e tij u kthye në Krime pas pavarësisë së Ukrainës në vitin 1991 dhe ai u bë një aktivist dhe një anëtar kryesor i komunitetit tatar të Krimesë.
Pas aneksimit të Krimesë, tatarët e Krimesë kanë mbajtur një qëndrim kryesisht pro-ukrainas dhe shumë prej tyre janë arrestuar nga forcat pushtuese ruse.
Ndërkohë, Shtëpia e Bardhë ka konfirmuar se pesë zyrtarë amerikanë do të jenë të pranishëm në dhomë me Donald Trumpin kur Volodymyr Zelensky të takohet me presidentin amerikan në Zyrën Ovale të hënën në mbrëmje.
Ata janë zëvendëspresidenti JD Vance, sekretari i Shtetit Marco Rubio, shefja e Shtabit të Shtëpisë së Bardhë Susie Wiles, i dërguari special, Steve Witkoff dhe i dërguari special, Keith Kellogg.
Zelensky do të shoqërohet nga Andriy Yermak, shefi i tij i lartë i stafit dhe Rustem Umerov, ish-ministër i Mbrojtjes dhe tani kreu i Këshillit Kombëtar të Sigurisë dhe Mbrojtjes së Ukrainës.
