-
Përktheu:
Flutura Gashi-Mehmeti
- 30 nëntor 2025 11:25
- Shpërndaje në:
Zyrtarë të lartë të administratës Trump do të takohen me negociatorët ukrainas në Florida këtë fundjavë, me qëllim ndërmjetësimin e përfundimit të luftës së Rusisë në Ukrainë.
Ata po përgatisin terrenin për bisedimet e planifikuara këtë javë në Moskë me udhëheqësin rus, Vladimir Putin, raporton AP.
Sekretari i Shtetit ,Marco Rubio, i Dërguari Special, Steve Witkoff dhe Jared Kushner, dhëndri i presidentit të SHBA-së, Donald Trump, pritet të takohen me një delegacion ukrainas për të diskutuar më tej detajet e një kuadri të propozuar paqeje - bisedime që vijnë në një moment të ndjeshëm për Ukrainën, ndërsa ajo vazhdon të kundërshtojë forcat ruse që nisën pushtimin e vendit në vitin 2022.
Të premten, pak para takimit në Florida, presidenti ukrainas, Volodymyr Zelensky, ka njoftuar dorëheqjen e shefit të tij të fuqishëm të stafit, Andrii Yermak, i cili deri në tani ishte negociatori kryesor i vendit në bisedimet me SHBA-në.
Njoftimi erdhi pasi shtëpia e Yermak u kontrollua nga hetuesit anti-korrupsion.
Qeveria e Zelenskyt është tronditur nga pasojat e një skandali të përvetësimit të 100 milionë dollarëve nga sektori i energjisë, përmes ryshfeteve të paguara nga kontraktorët, duke shkaktuar presione të reja të brendshme për Zelenskyn.
Vetëm një javë më parë Rubio ishte takuar me Yermak në Gjenevë, ku secila palë tha se bisedimet kishin qenë pozitive në hartimin e një plani të rishikuar paqeje.
Tani, delegacioni ukrainas përfshin Andrii Hnatov, kreun e forcave të armatosura të Ukrainës, Andrii Sybiha, ministrin e Jashtëm të Ukrainës, dhe Rustem Umerov, kreun e këshillit të sigurisë së Ukrainës, ka bërë të ditur Zelensky.
Diplomatët do të përqëndrohen në rishikimin e planit të propozuar prej 28 pikash të Trumpit, të zhvilluar në negociatat midis Uashingtonit dhe Moskës.
Ky plan u kritikua si shumë i orientuar drejt kërkesave ruse. Fillimisht parashikoi që Ukraina t'ia lëshonte të gjithë rajonin lindor të Donbasit Rusisë - një pikë ngërçi për Kievin.
Plani, të cilin Trumpi e ka minimizuar që atëherë si një “koncept” ose një “hartë” që duhet “përmirësuar”, do të vendoste gjithashtu kufizime në madhësinë e ushtrisë së Ukrainës, do ta bllokonte vendin nga anëtarësimi në NATO dhe do t’i kërkonte Ukrainës të mbante zgjedhje brenda 100 ditësh.
Negociatorët kanë treguar se korniza ka ndryshuar, por nuk është e qartë se si janë ndryshuar dispozitat e saj.