-
Përktheu:
Flutura Gashi-Mehmeti
- 26 nëntor 2025 08:34
- Shpërndaje në:
I dërguari i Donald Trumpit, Steve Witkoff, do të zhvillojë bisedime në Kremlin javën e ardhshme, ndërsa SHBA-ja vazhdon përpjekjet për një marrëveshje për t'i dhënë fund luftës në Ukrainë.
Vizita, e cila u konfirmua nga ndihmësi i ngushtë i politikës së jashtme të Vladimir Putinit, Yuri Ushakov, të mërkurën, vjen pasi Ukraina ka thënë se kishte arritur një "mirëkuptim të përbashkët" me Shtëpinë e Bardhë për një marrëveshje të mundshme paqeje, raporton BBC.
Të martën, Trumpi ka thënë se e kishte ngarkuar Witkoff të takohej me presidentin rus, ndërsa sekretari i Ushtrisë i SHBA-së, Dan Driscoll, po dërgohej në Ukrainë.
Kjo vjen pas publikimit javën e kaluar të një plani prej 28 pikash, për të cilin presidenti i SHBA-së ka thënë se që atëherë ishte "përmirësuar, me kontribut shtesë nga të dyja palët".
Duke folur me gazetarët para se Kremlini të konfirmonte vizitën, Trumpi ka thënë se dhëndri i tij Jared Kushner - i cili ka vepruar si këshilltar në Shtëpinë e Bardhë gjatë bisedimeve të mëparshme diplomatike, mund të marrë pjesë gjithashtu në takimin e Kremlinit.
Ai ka thënë se një marrëveshje do të përfshinte lëshime tokash "në të dyja drejtimet" dhe "përpjekje për të pastruar kufirin".
Presidenti, i cili e ka bërë sigurimin e një marrëveshjeje për t'i dhënë fund konfliktit një qëllim kyç të politikës së jashtme, ka thënë se nuk i ka dhënë asnjërës palë një datë për të rënë dakord për një marrëveshje, duke thënë se “afati i fundit për mua është kur të mbarojë”.
Kremlini më parë ka thënë se Rusia nuk ishte konsultuar ende për draft-marrëveshjen e re, duke paralajmëruar se mund të mos pranojë ndryshime në planin e javës së kaluar.
Ministri i Jashtëm rus, Sergei Lavrov, ka thënë se ndërsa Moska ka qenë në favor të kuadrit fillestar amerikan, situata do të ishte "thelbësisht e ndryshme" nëse do të kishte pësuar ndryshime thelbësore.
Deri të martën në mëngjes, Kremlini nuk ka marrë një kopje të planit të ri, ka thënë Lavrov, duke akuzuar Evropën për minimin e përpjekjeve të paqes të SHBA-së.
Disa nga çështjet për të cilat Rusia dhe Ukraina ende kanë mosmarrëveshje të thella thuhet se kanë mbetur të pazgjidhura deri më tani, duke përfshirë garancitë e sigurisë për Kievin dhe kontrollin e disa rajoneve në lindje të Ukrainës ku po zhvillohen luftime.
Presidenti ukrainas Volodymyr Zelensky ka thënë të martën se ishte gati të takohej me Trumpin për të diskutuar "pikat e ndjeshme" të pazgjidhura.
Një ditë më parë, Zelensky ka thënë se plani me 28 pika ishte zvogëluar, me disa dispozita të hequra.