Një çift austriak është në mesin e të zhdukurve nga vërshimet në Greqi, raporton BBC. Çifti ishte duke e kaluar muajin e mjaltit, ndërsa shtëpia ku po qëndronin u përmbyt.
Shërbimet e emergjencës i kanë thënë BBC-së se janë duke e kërkuar çiftin, ndërsa rezultojnë të zhdukur edhe disa persona tjerë.
Njerëzit në Greqi qendrore kanë mbetur të ngujuar mbi çati të shtëpive, pasi u përmbytën fshatra të tëra.
Dhjetëra persona raportohet se kanë humbur jetën që kur stuhia “Daniel” goditi Greqinë, Turqinë e Bullgarinë këtë javë.
Çifti austriak raportohet se vendosi të strehohej brenda një shtëpie të vogël të cilën e kishte marrë me qira për muajin e mjaltit. Por, shtëpia që gjendet në vendin turistik Potistika u përmbyt të martën mbrëma.
Edhe
Shkon në 14 numri i të vdekurve nga përmbytjet në Greqi
Brigada e Zjarrfikësve të Greqisë ka thënë se po vazhdon kërkimi për personat e zhdukur, përfshirë edhe çiftin austriak.
Fshatrat rreth Palamasit janë përmbytur.
Kryetari i Palamasit, Giorgos Sakellariou, e ka përshkruar situatën si tragjike.
“Është tragjike. Uji është 1.5m deri 2 metra i thellë. Në shtëpinë ku jam, jemi të ngujuar. Është 1.5 metra thellë së paku. Njerëzit janë ngujuar në shtëpitë e tyre”, ka thënë Sakellariou për “Skai TV”.
Edhe
820 persona shpëtohen nga ekipet emergjente në Greqi
Moti ekstrem po ashtu ka goditur Athinën dhe ishullin Skiathos, si dhe zonat bregdetare Volos e Pelion.
Kryeministri i Greqisë, Kyriakos Mitsotakis, ka anuluar angazhimet për këtë fundjavë, ndërsa kriza ka përshkallëzuar.
