Zyra e BE-së në Kosovë për plagosjen e zyrtarit në Gjakovë: Hetimi po vazhdon, jemi të tronditur

Zyra e Bashkimit Evropian në Kosovë ka thënë se janë të tronditur nga lajmi se një zyrtar i BE-së në Gjakovë është therur me thikë.

Zëdhënësi i kësaj zyre, Nikola Gaon, ka thënë se janë duke u zhvilluar hetime nga autoritetet.

“Jemi të shokuar nga ky lajm dhe i dëshirojmë shërim të shpejtë dhe të plotë. Hetimi është duke u zhvilluar dhe autoritetet po përcaktojnë faktet. Meqenëse është hetim aktiv, nuk jemi në gjendje të japim detaje të mëtejshme në këtë kohë”, ka thënë ai.

Policia e Kosovës në raportin 24-orësh ka njoftuar se një shtetas i huaj ka kërkuar ndihmë mjekësore në Qendrën Kryesore të Mjekësisë Familjare në Gjakovë, pasi dyshohet se është therur me thikë. 

Rasti ka ndodhur gjatë mbrëmjes të së martës, teksa viktima dyshohet se ka pasur dy plagë kur ka pranuar trajtim mjekësor. 

Viktima me udhëzim të mjekut kujdestar është dërguar në QKUK.