Deponia e planifikuar në Harilaq po konsiderohet “bomba e radhës” për ambientin në Fushë Kosovë

Kuvendi Komunal i Fushë Kosovës e ka kundërshtuar ashpër ndërtimin e deponisë së materieve të rrezikshme, e cila është caktuar të ndërtohet në Harilaq, me një vendim të Qeverisë së Kosovës.

Asamblistët e kanë vlerësuar si një bombë tjetër të kurdisur këtë deponi përveç asaj të Mirashit, tymit të termocentraleve, detonimit të gurthyesve dhe bombolave të naftës. Aty 27 anëtarët e këtij Kuvendi Komunal njëzëri i thanë JO ndërtimit të kësaj deponie.

U tha se do ta kundërshtojnë këtë projekt dhe në asnjë mënyrë nuk do të lejojnë që në territorin e tyre të ndërtohet një deponi e tillë, raporton KTV. Sipas tyre, materiet industriale e toksike që do të vendosen, ua rrezikojnë ajrin, ujin e shëndetin këtyre banorëve.

Asamblistët i thanë përfaqësuesit të Ministrisë së Mjedisit se po e shkelin Ligjin për mbrojtjen e ambientit. Ndërkaq, kjo deponi u quajt bombë e radhës për banorët e Fushë Kosovës.

Ndërkaq, kryesuesi i Komisionit nga Ministria e Mjedisit insistoi se lokacioni është i qëlluar.

Asamblistët në këtë mbledhje theksuan faktin se pothuajse të gjitha vendet e rajonit kanë refuzuar ndërtimin e këtyre deponimeve me materie të rrezikshme.