Bunjaku kujtohet nga kolegu i tij: Do të jetojë në çdo hap të lirisë së këtij vendi

Heroi Afrim Bunjaku është kujtuar nga kolegu i tij, Fahri Shala, në dyvjetorin e rënies së tij në krye të detyrës në Banjskë.

Duke kujtuar momentet e fundit me të, Shala ka thënë se ato u shndërruan në dëshmi të pavdekshme të besnikërisë, trimërisë dhe dashurisë së tij për atdheun.

Dhimbjen për humbjen e kolegut të tij e ka përshkruar si të madhe, porse krenarinë për sakrificën që ai ka bërë e ka quajtur lehtësim të shpirtit dhe forcë për të ecur përpara.

“Me përulje e respekt të pafund, përkulemi para aktit të tij sublim, para vendosmërisë dhe guximit që e bënë të flijohej për mbrojtjen e sovranitetit të vendit tonë të shtrenjtë. Gjaku i tij, ashtu si gjaku i të gjithë dëshmorëve, është gurëthemeli i shtetit tonë, trashëgimia më e shenjtë mbi të cilën ndërtojmë të ardhmen. Veprat e tij janë frymëzim i gjallë, udhërrëfyes për brezat që do të vijnë, për t’u kujtuar se liria ka emër, se liria ka çmim dhe ky çmim është gjaku i dëshmorëve”, ka shkruar Shala.

Duke shtuar se Bunjaku nuk është vetëm kujtim i dhimbjes, ai e ka quajtur atë flamur të guximit, shtyllë të nderit dhe mishërim të dashurisë së pashuar për Kosovën.

Edhe Arbëri 10 muaj më parë Osmani: 24 shtatori na kujton se liria kërkon sakrificë, por edhe se Kosova është e pathyeshme

Sipas Shalës, ai do të jetojë në çdo hap të lirisë dhe në çdo frymëmarrje të këtij vendi që ai mbrojti me gjakun e tij.

Shala është edhe dëshmitar në rastin Banjska.