Ndryshohet plani i betimit të kryetarit të Zveçanit

Ka ndryshuar lokacioni i planifikuar për betimin e kryetarit të Zveçanit, Ilir Peci të enjten. Betimi i tij nuk pritet të mbahet në Kullën e Isë Boletinit, siç pati shprehur synim vetë ai, por në shkollën “Isa Boletini”.

Aktualisht institucionet e sigurisë janë duke e vëzhguar terrenin për të vendosur bashkë me kryetarin e ri për lokacionin.

Vetë Peci nuk ka konfirmuar nëse është ndryshuar lokacioni i betimit.

Më herët gjatë ditës, kryeministri Albin Kurti u shpreh se betimi i tre kryetarëve të komunave veriore të enjten do të bëhet në ndërtesa publike.

Ilir Peci, kryetar i sapozgjedhur i Komunës së Zveçanit, synon që betimin si kryetar i komunës ta bëjë në Kullën e heroit kombëtar, Isë Boletini, në fshatin Boletin të kësaj komune. Ai pritet të betohet të enjten në ceremoninë që pritet të nisë në orën 10.

Në të njëjtën orë, do të betohet edhe Izmir Zeqiri në fshatin Qabër të Zubin-Potokut.

E tri orë më vonë, Lulzim Hetemi, kryetar i sapozgjedhur i Leposaviqit, synon të kryejë betimin në një zyrë lokale në Bistricë.

Më 23 prill, në Mitrovicë të Veriut, Leposaviq, Zveçan dhe Zubin Potok u mbajtën zgjedhjet e jashtëzakonshme lokale. Sipas KQZ-së, Lëvizja Vetëvendosje fitoi garën për kryetar komune në Mitrovicë të Veriut dhe Leposaviq. Partia Demokratike e Kosovës fitoi në Zveçan dhe Zubin Potok.

Lista Serbe, partia më e madhe e serbëve në Kosovë nuk mori pjesë në zgjedhje dhe u bëri thirrje qytetarëve serbë që ta bojkotojnë procesin zgjedhor.

Komunat në veri mbetën pa kryetarë nga nëntori i vitit të kaluar, kur përfaqësuesit serbë në atë zonë dhanë dorëheqje nga vendet e tyre të punës, për shkak të mospajtimit me një vendim të Qeverisë së Kosovës për riregjistrimin e makinave me targa ilegale serbe.

© KOHA. Të gjitha të drejtat janë të rezervuara.