Hendbollistët e Kosovës i kanë mbyllur me humbje kualifikimet për në Kampionatin Evropian.
Të dielën mbrëma në ‘s-Hertogenbosch, Kosova pësoi disfatë me pesë gola dallim ndaj përfaqësueses së Holandës, 34:29.
“Dardanët” e mbyllën kampanjën kualifikuese për “Euro 2026” me tri pikë. E patën një barazim 33:33 me Holandën në Prishtinë dhe një fitore 31:30 ndaj Ukrainës.
Grupin e fituan Ishujt Faroe me nëntë pikë, ndërsa Holanda e dyta pati tetë pikë. Ukraina me katër pikë përfundoi e treta.
Pas disfatës 25:23 nga Ishujt Faroe të enjten mbrëma në Prishtinë, gjasat për avancim në turneun final që organizohet në fillim të vitit të ardhshëm në Danimarkë, Norvegji e Suedi, ishin fare të vogla.
Edhe
Kosova me gjasa të vogla për kualifikim
Në fillim të takimit, Kosova pati lojë të mirë duke krijuar edhe dy gola epërsi. Pas 23 minutash rezultati ishte i barabartë, 11:11.
Por, prej atij momenti, holandezët dolën para dhe nuk e rrezikuan më fitoren.
Pjesa e parë u mbyll me pesë gola dallim për vendësit, 16:11.
Portieri holandez Bart Ravensbergen pati disa pritje të mira në këtë pjesëlojë.
Kosova u afrua në pjesën e dytë edhe në tri gola, 18:15.
Por hendbollistët e udhëhequr nga selektori Bujar Qerimi, nuk e patën forcën të bënin diçka më shumë.
Edhe
Kosova shkëlqen por barazon me Holandën
Holanda reagoi me mbrojtje të fortë e sulm efikas, duke krijuar epërsi prej tetë golave pas 52 minutash, 29:21.
Deri në fund nuk lejoi befasi dhe e regjistroi fitoren e tretë në grup, krahas dy barazimeve e një disfate.
Leonard Gegaj ishte më i dalluari te Kosova me tetë gola. Gjashtë gola i kishte kapiteni Valon Dedaj, ndërsa Drilon Tahirukaj shënoi pesë gola.
Me nga tri gola ndeshjen e mbyllën Luigj Quni dhe Egzon Gjuka. Drenit Tahirukaj i shënoi dy gola, ndërsa nga një gol realizuan Olsi Mulaj dhe Lulzin Shabani.
Portieri Haris Berisha i kishte shtatë spritje.
Te skuadra e Holandës, kontributin më të madh në fitore e pati Rutger ten Velde që i shënoi 12 gola në 15 tentime. Nga katër gola realizuan Ivar Stavast dhe Dani Baijens. Ndërkohë portieri Ravensbergen u shqua me 14 pritje nga 35 gjuajtje.
Edhe
Kosova e humb thellë ndeshjen e parë kualifikuese për “Euro 2026”
Kosova në këtë ndeshje pati mungesa të shumta. Për shkak të lëndimeve nuk luajtën Bujar Ramosaj, Rron Ramadani, Kastriot Jupa, Shaban Zogaj e Lionel Mirdita.
Përfaqësuesja e Kosovës në hendboll, ashtu si në sportet e tjera ekipore, nuk ka arritur që të kualifikohet për ndonjë ngjarje madhore.
