Trajneri i Ballkanit, Bledi Shkëmbi është ndarë i kënaqur me fitoren e ekipit të tij përballë Drenicës.
Ballkani të premten, triumfoi në shtëpi me rezultatin 2:1. Shkëmbi ka thënë se ky triumf ishte i rëndësishëm për ekipin e tij pas humbjes nga Llapi në vikendin e shkuar.
“Vinim nga humbja prej Llapit dhe na është nevojitur fitorja për t’u kthyer fuqishëm. Patëm raste të shumta por nuk arritëm ti shfrytëzonim të gjitha. Nuk ishte aspak e lehtë por jam i lumtur që ia dolëm mbanë. Duhet të përmirësohemi për ndeshjet tjera dhe do të punojmë që të përgatitemi sa më mirë për pjesën e mbetur të kampionatit”, ka thënë Shkëmbi.
Ndërkohë, ndihmëstrajneri i Drenicës, Johanes Tafaj ka thënë se ekipi nga Skenderaj tregoi paraqitje të mirë por nuk arriti të shënoj më shumë se njëherë.
Tafaj edhe në këtë ndeshje e ka udhëhequr Drenicën pasi trajneri Bledar Devolli ishte i suspenduar.
“E dinin se do të ishte shumë vështirë pasi përballë kishim një kundërshtar të fortë, i cili luan shumë mirë në shtëpi. E nisëm mirë por me të ulur ritmin e lojës, e pësuam golin e parë dhe kjo bëri që ekipi të bie psikologjikisht”, ka thënë Tafaj.
