Kralevë, 22 korrik – Luiza Gega ka siguruar kualifikimet në Lojërat Olimpike që vitin e ardhshëm do të organizohen në kryeqytetin francez, Paris.
Gega e ka siguruar kualifikimin në Olimpiadën e vitit të ardhshëm, pas garës së suksesshme që e pati të shtunën në Kralevë të Serbisë, ka njoftuar Komiteti Olimpik Kombëtar Shqiptar.
Në Kampionatin Ballkanik të Atletikës, atletja Luiza Gega triumfoi në disiplinën 3000 metra me pengesa, me kohën 9:21.53 minuta.
Në Kampionatin Ballkanik të Atletikës po marrin pjesë 20 shtete, ndërsa kualifikimet për “Parisi 2024”, kanë nisur nga 1 korriku.
Norma kualifikuese është 9:23.00 minuta, ka shkruar KOKSH të shtunën.
Atletja nga Shqipëria ishte e jashtëzakonshme edhe në Lojërat Evropiane që u zhvilluan në muajin qershor në Poloni.
Ato shërbenin edhe si Kampionat Ekipor Evropian në Atletikë.
Edhe
Kampionia e Evropës pjesëmarrëse në Maratonën e Prishtinës
Gega kishte fituar dy gara në Divizionin 3 të Evropianit të Atletikës në konkurrencë ekipore.
Shqipëria kishte përfunduar e nënta në Divizionin e tretë, kurse Gega kishte fituar garën e vrapimit në 5000 metra dhe në 3000 metra me pengesa.
Në garën 3000 metra vrapim me pengesa, që është disiplina e preferuar e Gegës, u vendos edhe rekord të Kampionatit Ekipor Evropian, me kohën prej 9:17.31 minuta.
