Asnjë futbollist i ftuar nga selektori i Përfaqësueses së Rumanisë, Edi Iordanescu, për ndeshjet kundër Kosovës dhe Zvicrës në kuadër të kualifikimeve për “Euro 20224” nuk është pjesë e ndonjërës prej top pesë ligave evropiane të futbollit. Kosova ka gjashtë futbollistë që janë pjesë e ligave më të forta në Evropë, ndërsa numri i këtyre lojtarëve që luajnë te Zvicra është dukshëm më i madh. Zvicra ka 17 lojtarë që janë pjesë e top pesë ligave evropiane.
E këtë në Rumani po e shohin si disavantazh të madh në përballjet e këtij muaji. Razvan Marin i Empolit dhe Vlad Chiriches i Cremoneses në Serie A, si dhe Ionut Radu i Auxerreit në Ligue 1, janë të lënduar. Ndërsa, nuk janë ftuar lojtarët e Genoas, Radu Dragushin dhe George Pushcash, që kanë siguruar inkuadrimin në Serie A. Dy prej lojtarëve të Rumanisë në listë janë pjesë e Serie B të Italisë. Kosova luan në shtëpi kundër Rumanisë më 16 qershor në stadiumin “Fadil Vokrri” në Prishtinë. Lojtarët e ftuar nga përzgjedhësi i Kosovës, Alain Giresse, që janë pjesë e top pesë ligave evropiane, janë portieri Samir Ujkani (Empoli), Mërgim Vojvoda (Torino), kapiteni Amir Rrahmani (Napoli).
Që të tre janë pjesë e skuadrave të Serie A, derisa Rrahmani u shpall kampion me Napolin. Sulmuesi Vedat Muriqi është pjesë e Mallorcas në La Liga dhe pati sezon të shkëlqyer. 29-vjeçari realizoi 16 gola dhe pati katër asistime në 37 ndeshje. Ndërkohë, dy prej 23 lojtarëve të listës së Kosovës janë pjesë e elitës së futbollit francez. Edon Zhegrova e mbylli kampanjën me Lillen në vendin e pestë. Pati katër gola të shënuar e katër asistime në 25 ndeshje. Ndërsa Elbasan Rashani është pjesë e Clermontit që përfundoi në vendin e tetë në Francë. Ai e mbylli kampanjën me katër gola të shënuar e tri asistime në 32 ndeshje.
“Nuk mendoj se Kosova është ekip më i mirë se ne, por në duhet të japim gjithçka nga vetja për të fituar në Kosovë. I kemi dy ndeshje jashtë ku mund të marrim katër pikë”, ka thënë përzgjedhësi i Rumanisë, Iordanescu.
Në mesin e 17-të lojtarëve të Zvicrës që bëjnë gara në top pesë ligat evropiane është edhe Granit Xhaka. Xhaka është kapiten i Zvicrës, ndërsa me Arsenalin në Premier League doli nënkampion. Mesfushori qendror sezonin e mbylli me nëntë gola e shtatë asistime në 47 ndeshje në të gjitha garat. Është 30-vjeçar, ndërsa çmimi i tij në treg vlerësohet rreth 28 milionë euro. Kosova, Zvicra e Rumania janë në Grupin I kualifikues për “Euro 2024”. Zvicra dhe Rumania i prijnë Grupit I me nga gjashtë pikë të mbledhura pas dy ndeshjeve të luajtura në këtë cikël. Kosova në dy ndeshje mori dy pikë. Një pikë premtuese e mori në Tel-Aviv kundër Izraelit, ndërsa dëshpëroi me barazimin kundër Andorrës në Prishtinë. Të dyja ndeshjet i mbylli me rezultatin 1:1. Andorra është në pozitën e katërt me një pikë nga dy ndeshje, aq sa ka edhe Izraeli në pozitën e pestë. Bjellorusia është e fundit në grup pa pikë në dy takime të luajtura. Tri ditë pas duelit me Rumaninë, Kosova do të luajë në Budapest kundër Bjellorusisë.