Skuadra e Juventusit është e vendosur për ta transferuar mesfushorin Paul Pogba në verë. Mediumet britanike kanë raportuar të mërkurën se ekipi italian tashmë i ka bërë ofertë zyrtare francezin, i cili në fund të këtij edicioni do të jetë lojtar i lirë pasi i skadon kontrata me Manchester Unitedin.
Juventusi i ka propozuar Pogbas kontratë katërvjeçare me pagë vjetore prej 12 milionë eurosh për ta bindur që të kthehet në Torino.
28-vjeçari ka refuzuar disa herë ofertën e Manchester Unitedit për rinovimin e kontratës, duke lënë të hapur mundësinë e largimit.
Te Juventusi po e shohin Pogban si përforcim të duhur për sezonin tjetër. Ai ka luajtur për Juventusin katër sezone (2012-2016) përpara se t’i bashkohej Unitedit.
Këtë edicion, Pogba ka realizuar një gol dhe ka bërë nëntë asistime në 21 paraqitje në të gjitha garat për ekipin anglez.