Këtë vikend nis stinor pranveror në Superligën e Kosovës në hendboll në dy konkurrencat, ka njoftuar të premten Federata e Hendbollit të Kosovës (FHK). Te meshkujt, do të ketë ndeshje interesante që do të zhvillohen në kuadër të xhiros së 15.
Megjithatë, dueli me interesant do të jetë ai i skuadrave me traditë, Besa Famgas dhe Kastrioti që luhet të dielën prej orës 18:00. Kjo ndeshje luhet në Ferizaj me marrëveshje te dy skuadrave. Kastrioti ka bërë disa përforcime dhe synon t’ia shkaktojë Besës humbjen e parë këtë sezon pasi pejanët prijnë në tabelë me 28 pikë pas 14 xhirove të luajtura.
Të dielën por prej orës 17:30, në Gjakovë do të zhvillohet ndeshja mes Vëllaznimit dhe Llapit. Ndërkohë, xhiroja nis të shtunën me tri ndeshje në program. Në kryeqytet, skuadra e Prishtinës e pret Trepçës prej orës 19:00 ndeshje dy duelet tjera, që po ashtu nisin në të njëjtën kohë, janë: Deçani – Zhegra dhe Rahoveci – Drenica.
Ndërkohë, në konkurrencën e femrave, do të zhvillohet xhiroja e 12. Të shtunën, takohen: Vushtrria – Shqiponja (14:00, Jusuf Gërvalla – Prishtina (15:30), Vjosa – Samadrexha dhe Ulpiana – Ferizaj (17:00).
Të dielën, Istogu luan në Gjilan kundër Dritës prej orës 14:30 ndërsa në Gjakovë zhvillohet ndeshja mes Vëllaznimit e Kastriotit.
